Лідарка дэмакратычных сілаў Беларусі Святлана Ціханоўская на палях Мюнхенскай канферэнцыі бяспекі правяла сустрэчу з Кітам Келагам, спецыяльным пасланнікам прэзідэнта ЗША Доналда Трампа ў справе Расеі і Украіны.
Як паведаміў галоўны дарадца Святланы Ціханоўскай Франак Вячорка, на сустрэчы лідарка дэмсілаў Беларусі «адзначыла паспяховае вызваленне трох закладнікаў з турмы, уключаючы двух палітычных зняволеных», а таксама «падзякавала адміністрацыі Трампа за падтрымку і каардынацыю ў гэтым пытанні».
Паводле Вячоркі, абмяркоўвалася таксама магчымасць прызначэння спецпасланніка ў справе Беларусі і «важнасць уключэння беларускага пытання ў перамовы аб Украіне».
«Я растлумачыла генералу, што для ўстойлівага міру неабходная прадказальная Беларусь без расейскай вайсковай прысутнасці. Мы дамовіліся працягваць камунікацыю», – сказала па выніках сустрэчы Святлана Ціханоўская.
Нагадаем, спецыяльны прадстаўнік прэзідэнта ЗША Кіт Келаг заявіў, што ў мірных перамовах маюць удзельнічаць толькі Вашынгтон, Кіеў і Масква.
«За сталом перамоваў могуць сядзець украінцы, расейцы і, натуральна, амерыканцы», – заявіў Келаг на Мюнхенскай канферэнцыі.
Дарэчы, менавіта Келаг ёсць сустаршынём Інстытуту палітыкі «Амерыка перадусім» і быў там сёлета адным з аўтараў плану ўрэгулявання вайны ва Украіне. Згодна з гэтым планам, Злучаныя Штаты павінны спрыяць спыненню агню і дамагацца развязання ўкраінскага канфлікту шляхам перамоваў. Пры гэтым Вашынгтон працягне перадаваць Украіне зброю, каб перадухіліць новыя атакі Расеі, аднак толькі ў тым выпадку, калі Кіеў пойдзе на мірныя перамовы. ЗША таксама папярэдзяць Маскву, што ў выпадку адмовы ад перамоваў Вашынгтон павялічыць аб’ёмы дапамогі Кіеву, пісалі на Бі-Бі-Сі.
Каб падштурхнуць Расею да ўдзелу ў перамовах, ЗША адкладуць пытанне сяброўства Украіны ў NATO на працяглы час у абмен на «шырокае і кантраляванае пагадненне з гарантыямі бяспекі». Аўтары дакладу не планоўваюць патрабаваць ад Кіева адмовіцца ад намеру вярнуць усе свае тэрыторыі, захопленыя Расеяй, але Украіна павінна пагадзіцца выкарыстоўваць толькі дыпламатычныя сродкі.
Адзначым таксама, што цяпер ужо былы генеральны сакратар NATO Енс Стольтэнбэрг заявіў летась у ліпені, што Еўропе варта рыхтавацца да таго, што цяперашні канфлікт можа зацягнуцца на 10 гадоў.
Надзея Вольная belsat.eu
