Спецыяльны прадстаўнік прэзідэнта ЗША Кіт Келаг заявіў, што ў мірных перамовах маюць удзельнічаць толькі Вашынгтон, Кіеў і Масква. Еўрапейскіх палітыкаў за сталом перамоваў ён не бачыць.
«За сталом перамоваў могуць сядзець украінцы, расейцы і, натуральна, амерыканцы», – заявіў спецпрадстаўнік прэзідэнта ЗША Кіт Келаг на Мюнхенскай канферэнцыі бяспекі, перадае агенцтва «The Associated Press».
На пытанне, ці азначае гэта, што еўрапейцаў на перамовах не будзе, чыноўнік адказаў:
,,«Я прытрымліваюся рэалізму. Думаю, гэтага не адбудзецца».
Абраная прэзідэнтка Святлана Ціханоўская раней казала, што «мы не павінны дазволіць Пуціну атрымаць Беларусь як суцяшальны прыз» пасля сканчэння вайны. Тое ж Ціханоўская паўтарыла ў час сёлетняга візіту ў ЗША. А на нядаўняй канферэнцыі «Новая Беларусь» ейны галоўны дарадца Франак Вячорка даводзіў: галоўная задача зараз – «каб мы былі не на стале, а за сталом перамоваў».
Цяперашнія ўлады ў Менску таксама прагнулі ўдзелу ў перамовах. У снежні летась намеснік міністра замежных справаў Юрый Амбразевіч сцвярджаў, што Беларусь «як ніхто іншы» зацікаўленая ў мірным развязанні канфлікту, і таму «мы ад самага пачатку заяўлялі, што прэтэндуем на месца за сталом мірных перамоваў, калі яны пачнуцца»:
«Для нас важна атрымаць гарантыі нашай ўласнай бяспекі. Фінальныя дамоўленасці мусяць абавязкова ўлічваць у тым ліку інтарэсы беларускага боку».
Праз два дні пасля гэтай заявы спікерка расейскага МЗС Марыя Захарава назвала «важным і неабходным» удзел Беларусі ў мірных перамовах. Паводле яе, «улік беларускіх інтарэсаў, у тым ліку ў галіне бяспекі, – абсалютны прыярытэт Расеі».
Сцяпан Кубік belsat.eu
