«Белсат» працягвае сачыць за рэпрэсіямі ў нашай краіне, якія не спыніюцца ні на дзень.
17 чэрвеня – 4 гады і 9 месяцаў, як за кратамі знаходзіцца каардынатарка валанцёрскай службы «Вясны» Марфа Рабкова. Яе затрымалі ў 2020 годзе, асудзілі да 15 гадоў турмы і вялікага штрафу за праваабарончую дзейнасць. Пасля апеляцыі тэрмін скарацілі на тры месяцы, і цяпер яна адбывае пакаранне ў гомельскай калоніі. Арганізацыя Amnesty International Polska пачала збор подпісаў, каб заклікаць польскі МЗС дамагацца яе вызвалення на міжнародным узроўні.
35-гадовую выкладчыцу англійскай мовы Алену Бразінскую, якая працавала ў моўным цэнтры «Чыстая граматыка», асудзілі за ўдзел у пратэстах паводле артыкула 342 КК. Дакладны прысуд невядомы: верагодна, ёй прызначылі «хатнюю хімію». 13 чэрвеня яе ўнеслі ў спіс «экстрэмістаў».
КДБ абнавіў спіс «асоб, якія маюць дачыненне да тэрарыстычнай дзейнасці». Цяпер у ім 1303 чалавекі, з іх 609 – беларусы.
Праваабаронцы прызналі яшчэ чатырох чалавек палітвязнямі. Гэта Максім Урбановіч, Мікалай Ляпёшка, Аляксандр Невар, Максім Лепушэнка. Такім чынам, на сённяшні дзень у краіне 1188 афіцыйна прызнаных палітычных зняволеных.
Суд Ленінскага раёна Магілёва ўнёс у спіс TikTok-акаўнт праекта «Загляне сонца» блогера Мікіты Мелказёрава і Telegram-канал «Филин. Оперативная аналитика и публицистика». Суд Пухавіцкага раёна 13 чэрвеня прызнаў «экстрэмісцкай» Instagram-старонку Вікторыі Фёдаравай, дырэктаркі «Прававой ініцыятывы». У той жа спіс трапіў і Telegram-канал «Адольф Гитлер кф», а таксама інтэрв’ю былой палітзняволенай Антаніны Канавалавай для праекта «Вот Так» пад назвай «Ужасы пресс-отряда в женской колонии Лукашенко».
Раман Шавель belsat.eu
