«Белсат» аналізуе вынікі чарговага тыдня поўнамаштабнай вайны, распачатай Расеяй ва Украіне. Пра становішча на фронце станам на 21 кастрычніка чытайце ў нашым матэрыяле.
Паступовы рух расейскіх войскаў на Куршчыне
На тэрыторыі Курскай вобласці Расеі цягам апошняга тыдня ініцыятыва захоўвалася за расейскімі вайскоўцамі, якія паступова развівалі свае ранейшыя поспехі.
Так, на тэрыторыі Глушкоўскага раёну войскі РФ амаль цалкам выціснулі праціўніка за дзяржаўную мяжу, і цяпер баі ідуць толькі з поўдня ад сяла Новы Пуць, дзе Збройным сілам Украіны пакуль удаецца ўтрымліваць пазіцыі ўздоўж мясцовай чыгуначнай лініі.
У суседнім Коранеўскім раёне расейцам удаўся рывок на некалькі кіламетраў на ўсход ад сяла Зялёны Шлях у бок Віктараўкі, у выніку чаго ўтварыўся доўгі і вузкі выступ па фронце.
Разам з тым, ніжэй па лініі сутыкнення, ЗСУ ўсё яшчэ ўдаецца ўтрымліваць пазіцыі з поўдня ад населенага пункту Любімаўка: тут яны ўжо працяглы час знаходзяцца ў паўатачэнні, што істотна пагаршае лагістыку, аднак пакуль інфармацыі пра пакіданне гэтых пазіцыяў не паступала.
У Суджанскім раёне расейскія войскі ціснуць у двух кропках з паўднёвага ўсходу ад адміністрацыйнага цэнтру, імкнучыся ў далейшым атачыць праціўніка ў шэрагу населеных пунктаў.
Агулам, паступовы рух расейцаў адзначаецца амаль па ўсёй лініі сутыкнення на Куршчыне, аднак казаць аб поўным правале абароны ЗСУ пакуль зарана: на асобных участках украінцы контратакуюць, што ўскосна ўказвае на іх праактыўную пазіцыю. Пры гэтым асноўныя поспехі расейскага боку па-ранейшаму грунтуюцца на істотнай перавазе ў жывой сіле і тэхнікі, якія пры падтрымцы авіяцыі і артылерыі намагаюцца прарывацца ў слабых месцах абароны праціўніка і атачаць яго.
Актывізацыя расейцаў на паўночным усходзе
На паўночным усходзе Харкаўскай вобласці паступова пагаршаецца становішча Збройных сілаў на тэрыторыі Купянскага раёну.
Так, на паўночным усходзе ад раённага цэнтру расейскія вайскоўцы, наступаючы з боку раней занятага сяла Сынькоўка, прарвалі абарону праціўніка і завязалі баі ў паўночнай частцы некалі буйнога сяла Петрапаўлаўка.
Адначасова з гэтым УС РФ ціснуць на рубяжы Іванаўка – Стэпавая Навасёлаўка – Кіслоўка – Катляроўка, аднак тут пакуль ЗСУ ўдаецца паспяхова адбівацца.
Між тым найбольшых поспехаў расейскія войскі дасягнулі на паўднёвым флангу, дзе напачатку яны замацаваліся на ўскрайках Калеснікоўкі, пасля чаго прасунуліся ў суседняй Круглякоўцы і выйшлі да ракі Аскіл. Такім чынам войскам РФ удалося разбіць групоўку праціўніка на паўночным усходзе Украіны на дзве часткі.
Цяпер, відавочна, будзе працягвацца рух расейцаў з поўначы і поўдня да Купянску з паступовым выцісканнем ЗСУ з левабярэжжа ракі Аскіл. У сваю чаргу ўкраінскі бок ужо распачаў прымусовую эвакуацыю насельніцтва раёну, што ўказвае на сапраўды складанае становішча Сілаў абароны краіны.
Ніжэй па фронце актыўнасць войскаў РФ засяроджаная на левым беразе іншай ракі – Жарабец, – дзе ЗСУ таксама ўтрымліваюць невялікі плацдарм. Самыя ўкраінскія вайскоўцы паведамляюць, што праціўнік цісне па ўсім фронце і мае паступовыя прасоўванні ў ваколіцах населеных пунктаў Макееўка, Неўскае, Ямпалаўка і Торскае.
Цяжкае становішча Збройных сілаў на гэтым участку ў першую чаргу тлумачыцца недахопам асабовага складу падраздзяленняў, якія ўкамплектаваныя на ўзроўні 10 –20%.
Становішча на Данбасе
Пасля трывалага часу адноснай стабільнасці нагадаў пра сябе і ўчастак фронту ў ваколіцах гораду Часаў Яр. Тут у сярэдзіне мінулага тыдня Узброеныя сілы РФ прарвалі абарону ўкраінцаў з боку дарогі Т-05-04 і істотна наблізіліся да паўднёва-ўсходніх ускрайкаў гораду.
Цяпер для расейскіх войскаў адкрываюцца добрыя перспектывы штурму гэтай часткі Часавага Яру, акрамя таго яны могуць паспрабаваць абысці населены пункт з поўдня.
Адначасова з гэтым фіксуецца паступовы рух расейцаў на паўночным флангу каля населеных пунктаў Грыгораўка і Калінаўка, а таксама непасрэдна ў паўночна-ўсходняй частцы Часавага Яру.
Ва ўмовах недахопу асабовага складу абарона ўкраінцаў у першую чаргу грунтуецца на выкарыстанні ўдарных БпЛА, што цяпер, аднак, істотна абмяжоўваецца праз пагаршэнне ўмоваў надвор'я.
Таксама на Данбасе варта звярнуць увагу на пакроўскі кірунак, дзе назіраецца пэўная актывізацыя расейцаў у ваколіцах гораду Сялідава. Тут асноўны рух УС РФ лакалізуецца на флангах, адкуль яны намагаюцца абысці населены пункт і атачыць. Між тым пэўная актыўнасць назіраецца і на ўсходніх ускрайках самога гораду.
Праўкраінскія крыніцы пішуць, што камандаванне РФ кідае ў бой вялізную колькасць пяхоты, што ўскосна ўказвае на завяршэнне ратацыі асабовага складу.
На суседнім курахаўскім кірунку войскі РФ засяродзіліся на правядзенні механізаваных штурмаў у ваколіцах населенага пункту Максімільянаўка. большая частка якога ў выніку апынулася пад іхным кантролем. За ўкраінцамі засталася толькі невялікая частка прыватнага сектару на захадзе сяла.
Поўны захоп Максімільянаўкі дазволіць расейцам канцэнтраваць тут штурмавыя групы, якія ў далейшым могуць выкарыстоўвацца для правядзення механізаваных штурмаў усходняй часткі Курахава або абыходу гораду з поўдня.
На іншых участках фронту адзначаюцца лакальныя пазіцыйныя баі, а таксама артылерыйскія абстрэлы ўздоўж лініі сутыкнення.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.
Наталля Кулыгіна belsat.eu
