У Варшаве праходзіць чацвёртая Канферэнцыя дыяспараў беларусаў з 23 па 25 траўня. Адбываюцца дыскусіі і супольны аналіз актуальных для беларусаў праблемаў. Да падзеі прыядналася лідарка дэмсілаў Беларусі Святлана Ціханоўская, піша ейны тэлеграм-канал.
Паведамляецца, што адной з галоўных падзеяў канферэнцыі стала прэзентацыя дакладу «BELPOL» пра ўдзел рэжыму Аляксандра Лукашэнкі ў вайне супраць Украіны.
А 24 траўня праходзяць панэльныя дыскусіі. Праз абмеркаванні і брэйнштормы ўдзельнікі і ўдзельніцы аналізуюць працу дыяспары і шукаюць шляхі паляпшэння становішча беларусаў у ключавых кірунках:
- легалізацыя, мабільнасць, бяспека;
- культура, адукацыя і нацыянальная ідэнтычнасць;
- падтрымка палітвязняў, рэпрэсаваных і добраахвотнікаў;
- развіццё дыяспары і ўзаемадапамога;
- фандрайзінг і практыка рэальных праектаў.
«Асаблівасцю сённяшняга дня стане тое, што ўдзельнікі не толькі паслухаюць экспертаў і спікераў – але і далучацца да працы ў групах, каб разам знаходзіць канкрэтныя рашэнні для рэальных праблемаў», – гаворыцца ў паведамленні.
Святлана Ціханоўская, якая прыядналася да падзеі, у вітальным слове казала менавіта пра важнасць супольнай працы.
,,«Тое, што мы сёння разам, – прыкмета таго, што нас абʼядноўвае любоў да Беларусі і адказнасць за будучыню. Каб пераадолець гэты цяжкі і доўгі марафон, нам патрэбныя ўстойлівыя структуры беларусаў замежжа, дзе будзе месца кожнаму. Структуры, пабудаваныя на даверы, на салідарнасці і, канешне, самаарганізацыі», – сказала лідарка дэмсілаў Беларусі.
Яна папрасіла прысутных, каб вынікам канферэнцыі стаў план кампаніяў, праектаў, ініцыятываў, якія ўжо цяпер можна рабіць разам.
«Падтрымка палітвязняў, культурніцкая дыпламатыя, мабільнасць, легалізацыя, адукацыя і прыцягненне рэжыму да адказнасці. Мы павінны шукаць рашэнні разам і не чакаць ідэальных умоваў, бо іх не будзе.
Нам не трэба адчайвацца, нам не трэба шукаць апраўданняў, а проста дзейнічаць: ствараць новыя супольнасці, наладжваць новыя кантакты, пашыраць беларушчыну, падтрымліваць адно аднаго, дзяліцца ідэямі і перадаваць досвед», – падвяла рысу Святлана Ціханоўская.
Арсен Рудэнка belsat.eu
