Еўракамісія кансультуецца з дзяржавамі-чальцамі з нагоды рыхтавання 18-га пакету санкцыяў супраць Расеі з мэтай спынення вайны супраць Украіны. Рашэнне аб тэрмінах патэнцыйных абмежаванняў яшчэ не прынята, самыя санкцыі на той момант ужо могуць змяніцца, паведамляе «Bloomberg» са спасылкай на асобаў, знаёмых з гэтым пытаннем.
Паводле выдання, Еўразвяз у рамках новага пакета санкцыяў разглядае магчымасць выключэння больш як 20 банкаў з міжнароднай аплатнай сістэмы SWIFT і забароны на газаправоды «Nord Stream». Таксама ЕЗ узважвае новыя гандлёвыя абмежаванні на суму каля 2,5 млрд еўраў, каб ён яшчэ больш скараціць даходы Расеі і яе здольнасць завалодаць тэхналогіямі, неабходнымі для вытворчасці зброі.
У рамках новага пакету Еўракамісія таксама плануе прапанаваць знізіць лімітавую цану на нафту для краінаў «Вялікай сямёркі» прыкладна да 45 долараў з сённяшніх 60. Але для гэтага можа спатрэбіцца згода ЗША. Пакуль узгадніць гэты захад не атрымліваецца.
Як заяўляецца, план ЕЗ у санкцыях супраць трубаправодаў «Nord Stream» ужо атрымаў падтрыманне Нямеччыны, хоць Доналд Трамп прапаноўваў яго аднаўленне ў якасці саступак для Расеі.
Асобна блок плануе паэтапна адмовіцца ад расейскага выкапнёвага паліва да канца 2027 года. Апроч таго, Еўразвяз імкнецца пашырыць свае санкцыі супраць ценявога флоту нафтавых танкераў Расеі і разглядае далейшыя абмежаванні для крэдытораў, якія, як лічыцца, дапамагаюць ваенным намаганням Масквы, а таксама для расейскага фонду наўпроставых замежных інвестыцый. Таксама плануецца абараніць еўрапейскія фірмы ад арбітражу ў рамках двухбаковых інвестыцыйных пагадненняў.
20 траўня краіны Еўрапейскага Звязу прынялі 17-ы пакет санкцыяў супраць Расеі. Еўразвяз увёў меры супраць 189 новых суднаў «ценявога флоту» Расеі, што перавозяць нафту ў абыход санкцыяў. Таксама санкцыі закранулі суднаходныя кампаніі і страхавальнікаў з ААЭ, Турэччыны і Гон-Конгу.
Дадаткова пад санкцыі трапілі буйныя расейскія энергетычныя кампаніі, як «Сургутнефтегаз», а таксама больш як 45 іншых кампаній і асобаў, што падтрымліваюць расейскі ВПК. ЕЗ абмежаваў экспарт тэхналогіяў і дэталяў падвойнага прызначэння, якія выкарыстоўваліся для абыходу санкцый – у тым ліку дронаў і станкоў, нават праз кампаніі з Кітаю, Ізраілю, Сербіі і іншых краінаў.
Новыя захады таксама закранаюць незаконнае выкарыстанне культурных і сельскагаспадарчых рэсурсаў Украіны на акупаваных тэрыторыях. У спіс падсанкцыйных устаноў трапіў і Менскі завод колавых цягачоў (МЗКЦ) за распрацоўку тэхнікі для расейскага войска.
Якуб Хруст belsat.eu
