Аддзел дыялекталогіі Інстытуту ўкраінскай мовы НАН Украіны запрашае ўзяць удзел у працы міжнароднай навуковай канферэнцыі «Дыялекты ў сінхраніі і дыяхраніі: даследчыя парадыгмы ў сучаснай дыялекталогіі», якая адбудзецца 9–10 кастрычніка ў Інстытуце ўкраінскай мовы НАН Украіны. Карыстацца можна любой славянскай мовай, акрамя беларускай і расейскай.
«Працоўныя мовы – украінская і іншыя славянскія (акрамя расейскай і беларускай), англійская», – гаворыцца ў афіцыйным паведамленні Інстытуту ўкраінскай мовы НАН Украіны.
Забарона беларускай мовы, відаць, выкліканая саўдзелам рэжыму Аляксандра Лукашэнкі ў агрэсіі Расеі супраць Украіны. Пры гэтым арганізатары не ўлічваюць, што ўсю сваю палітычную кар’еру Лукашэнка змагаецца з беларускай мовай.
Яшчэ ў 1995 годзе ён правёў рэферэндум, з дапамогай якога легалізаваў у Беларусі дзяржаўны статус расейскай мовы. У выніку станам на 2023 год па-беларуску навучалася толькі каля 10 % школьнікаў. А выкарыстанне беларускай мовы часта расцэньваецца ў Беларусі як нелаяльнасць да Лукашэнкі, на што рэгулярна звяртаюць увагу праўладныя аматары «русского мира».
Пры гэтым беларускую мову актыўна выкарыстоўваюць беларускія дэмакратычныя сілы, якія падтрымліваюць Украіну ў змаганні з расейскай агрэсіяй, і беларускія добраахвотнікі ў складзе ЗСУ.
Якуб Хруст belsat.eu
