Недалёка ад пункту пропуску «Берасце», каля мяжы ў лесе жыве вялікая група афганцаў, піша выданне BG.Media» са спасылкаю на афганскі тэлеканал «Wesal TV».
На інфармацыю афганскага выдання нібыта адрэагавалі ўлады Беларусі і скіравалі частку групы ў лагер для ўцекачоў і ў лякарню.
,,«Пасля публікацыі рэпартажу тэлеканалу «Wesal», улады Беларусі вывезлі 40 чалавек з ліку прыкладна 200 афганскіх уцекачоў, якія былі ў скрайне цяжкім становішчы на памежным пераходзе «Берасце» паміж Беларуссю і Польшчай, у лагер для ўцекачоў, а яшчэ 25 – у лякарню. Аперацыя ратавання астатніх працягваецца», – паведамляе афганскае выданне.
Улады Беларусі, у тым ліку Дзяржаўны памежны камітэт, ніяк не каментуюць інфармацыю пра афганскіх уцекачоў на мяжы, зазначае «BG.Media».
«Wesal TV» паведаміла пра групу з прыкладна 200 уцекачоў на беларуска-польскай мяжы 27 траўня. Афганцы называюць гэты раён «футбольнаю зонаю», дзе беларускія памежнікі збіваюць мігрантаў і выцясняюць на тэрыторыю Польшчы, а польскія – выпіхваюць іх назад у Беларусь.
Паводле аднаго з мігрантаў Махбуба, які выйшаў на сувязь з тэлеканалам «Wesal», афганцы застаюцца на мяжы ад 10 дзён да трох месяцаў. Сярод іх – шмат параненых са зламанымі рукамі, пабітымі тварамі ды іншымі пашкоджаннямі. Людзі цярпяць ад холаду і спёкі, ядуць траву і лістоту, п’юць ваду з балота, адзначае ўцякач.
Сем’і афганцаў вінавацяць у гэтай сітуацыі кантрабандыстаў, якія за грошы абяцалі перавезці людзей, але цяпер не адказваюць на тэлефанаванні. Сваякі ўцекачоў заклікаюць амбасады Афганістану, а таксама ўлады Беларусі і Польшчы зрабіць тэрміновыя захады для ўратавання іхных родных.
З пацяпленнем плынь нелегальных мігрантаў, якія ідуць з Беларусі ў Польшчу, павялічылася. У красавіку з'яўлялася ўсё больш дзён, калі колькасць спробаў нелегальна прайсці мяжу набліжалася да ста, а ў перыяд з 25 да 27 красавіка польскія памежнікі зафіксавалі больш за 290 спробаў незаконнага пранікнення ў Польшчу. У бок польскіх патрулёў мігранты кідалі камяні і галіны. Быў пашкоджаны службовы аўтамабіль. Агулам з пачатку года было зафіксавана больш за 2200 спробаў мінуць беларуска-польскую мяжу.
Спробы незаконна мінуць мяжу трываюць, нягледзячы на тое, што прэзідэнт Польшчы Анджэй Дуда 26 сакавіка падпісаў закон, згодна з якім у мігрантаў на польска-беларускай мяжы на працягу 60 дзён не прымаюць хадайніцтваў аб міжнароднай абароне. Аднак шмат каго цікавіць не Польшча, а Нямеччына.
Спыненне міграцыйнага крызісу застаецца адным з асноўных патрабаванняў Польшчы ў разблакаванні палітычнага дыялогу з Беларуссю. Аднак міграцыйны крызіс, што распачаўся ў 2021 годзе, не спыняецца. Акрамя таго, мігранты, якія спрабуюць трапіць у Польшчу з боку Беларусі, надалей паводзяць сябе агрэсіўна, атакуючы польскіх памежнікаў і вайскоўцаў. У 2024-м гэта прывяло да гібелі 21-гадовага польскага жаўнера Матэўша Сітэка.
Марыя Міхалевіч belsat.eu
