Чатыры гады і дзесяць месяцаў у Беларусі не спыняюцца масавыя палітычныя рэпрэсіі: штодня навіны пра новыя затрыманні, суды і пакаранні. Вось што стала вядома толькі за адзін дзень 4 красавіка.
Следчы камітэт паведаміў 4 красавіка пра затрыманне і выстаўленне абвінавачвання з «Здрадзе дзяржаве» тром менскім сацыёлагам, якія рабілі даследаванні для замежных замоўнікаў. Імёны затрыманых не назвалі, але вядома, што гэта 42-гадовы мужчына і жанчыны жанчын 37 і 43 гадоў. Першы рабіў даследаванне пра барацьбу з каронавірусам, другая і трэцяя – пра меркаванні наконт інтэграцыі з краінамі Еўразвязу.
Высветлілася, што затрыманы ноччу 31 сакавіка 27-гадовы грамадзянін ЗША і Чэхіі Антон Рос мае праблемы з памяццю. Ад 23 сакавіка яго шукалі ў Цюрыху маці і паліцыя.
Як стала вядома 4 красавіка, у судзе Заводскага раёну Менску 2 красавіка асудзілі 64-гадовую Жанну Вайніловіч, якую затрымалі пасля вяртання з Польшчы, паведамляе праваабарончы цэнтр «Вясна». Яе абвінавацілі ва ўдзеле ў паслявыбарчых акцыях пратэсту ў Менску ў 2020 годзе. Жанчыне пасля двух месяцаў у СІЗА прызначылі два гады «хатняй хіміі» – абмежавання волі без скіравання ў папраўчую ўстанову.
У Віцебску асудзілі лекараў за знішчэнне вакцынаў, расказвае канал «Витебск, я гуляю». Намесніца загадчыка паліклінікі № 6 Ірына Кочава і старэйшая медсястра Святлана Савіцкая далі падначаленым загад знішчыць звыш 6 тысяч дозаў вакцынаў ад COVID-19, у якіх не скончыўся тэрмін прыдатнасці. Кожную пакаралі трыма з паловай гадамі «хатняй хіміі». Але пакаралі таксама трох медсёстраў, якія выканалі загад – ім прысудзілі па два гады «хатняй хіміі». Вядомае імя адной з медсёстраў: Марына Когаль. Раней згадвалася, што ў справе фігуруе таксама Вікторыя Рудзеня і хтосьці па прозвішчы Мазур. Мядсёстры, як сцвярджала следства, фальсіфікавалі дакументы, пазначыўшы, што вакцыны былі скарыстаныя па прызначэнні. Шкоду ацанілі ў не менш як 120 тысяч рублёў.
47-гадовую жыхарку Салігорску будуць судзіць за грашовыя пераводы палітвязням, перадае «Вясна». Жанчына, паводле следства, зрабіла 70 грашовых пераводаў праваабаронцам на суму каля 600 рублёў для 54 чалавек, асуджаных за «экстрэмізм».
У спіс «экстрэмісцкіх матэрыялаў» дадалі шэраг інтэрнэт-старонак – ад Youtube-каналу «MozgON» асуджанага на 16 гадоў пазбаўлення волі палітвязня Уладзіміра Цыгановіча да прыватных старонак на Facebook, Instagram і VK. У «спіс экстрэмістаў» дадалі яшчэ 27 прозвішчаў — цяпер у ім 5115 чалавек.
«Вясна» апублікавала справаздачу аб сітуацыі з правамі чалавека ў сакавіку. За месяц праваабаронцы зафіксавалі 209 выпадкаў палітычна матываваных рэпрэсій – затрыманняў, ператрусаў і іншага. Агулам, з 2020 года, як мінімум 8147 чалавек сутыкнулася з крымінальным пераследам па палітычных матывах. У дачыненні да не менш за 6830 чалавек былі вынесеныя палітычна матываваныя прысуды.
Праваабаронцы «Mayday» расказалі пра навінку ў шклоўскай калоніі № 17: каля двух тыдняў таму з’явілася паслуга замовы тавараў у турэмнай краме праз планшэт падчас доўгіх спатканняў. Сваякам зняволеных, якія прыязджаюць на спатканні, даюць планшэт на 20 хвілін, дазваляюць выбраць любы тавар з дастаткова шырокага асартыменту. Але плаціць патрабуюць наяўнымі ў касу.
Алесь Наваборскі belsat.eu
