Грамадзяніна ЗША Антона Роса затрымалі працаўнікі беларускай мытні ноччу 31 сакавіка на чыгуначнай станцыі «Маладзечна».
Высветлілася, што ў 27-гадовага хлопца праблемы з памяццю, а з 23 сакавіка яго шукаюць у Цюрыху маці і паліцыя, піша Reform.news. Абвесткі з просьбаю дапамагчы ў ягоных пошуках былі апублікаваныя ў розных групах Facebook:
«Антон Рос, 27 гадоў, грамадзянін ЗША і Чэхіі, свабодна размаўляе па-англійску (без акцэнту), пакутуе на страту памяці. Ён ужо некалькі разоў за апошнія месяцы знікаў, не выходзіў на сувязь і з’яўляўся ў розных месцах. У снежні 2024 года страціў дакументы і асабістыя рэчы. Можа быць у стане дэзарыентацыі, не памятаць, хто ён, і не звяртацца па дапамогу», – гаворыцца ў абвестцы.
22 сакавіка Антон шмат разоў тэлефанаваў маці і прасіў набыць білет у Хургаду. Жанчына тэрмінова выехала ў аэрапорт Цюрыху, але сына ўжо не было ў тэрмінале. 23 сакавіка маці падала афіцыйную заяву ў паліцыю Цюрыху на вышук.
Беларускія прапагандысты адразу зладзілі з ім інтэрв’ю і заявілі, што грамадзянін ЗША мае «пэўныя праблемы са здароўем» і хоча застацца ў Беларусі. У Дзяржаўным памежным камітэце Беларусі заявілі, што пасля прыцягнення да адміністратыўнай адказнасці яго дэпартуюць на тэрыторыю Літвы.
Тэса Анэйда belsat.eu
