Шмат беларусаў, якія выехалі за мяжу, раней ці пазней сутыкаюцца з неабходнасці замены правоў кіроўцы. Пры гэтым у людзей, якія ўжо сутыкаліся з рэпрэсіямі ці маюць пагрозу пераследу, маюць сваю спецыфіку ў гэтым. Пра тое, як гэта зрабіць у Польшчы, «Белсату» расказалі ў валанцёрскай ініцыятывы «Partyzanka».
Для замены правоў большасці беларусаў неабходна атрымаць даведку з Беларусі пра іх сапраўднасць і дзейнасць. Зрабіць гэта можна або асабіста наведаўшы Беларусь, або звярнуўшыся ў беларускі кансулат у Польшчы. Таксама запыт можна скіраваць праз аддзел камунікацыі, які займаецца ў тым ліку заменай правоў.
«Partyzanka» раіць беларусам загадзя адсочваць тэрмін важнасці правоў. Тым больш, што вядомыя выпадкі, калі беларускія дыпламаты ў Польшчы адмаўлялі надаваць даведкі і патрабавалі для гэтага прыехаць у Беларусь, расказала аператарка гарачай лініі ініцыятывы.
У цэлым «Partyzanka» раіць мяняць правы як найхутчэй. Рабіць гэта можна ўжо праз паўгода пражыцця ў Польшчы, нават на падставе візы. У тым ліку таму, каб пазбегнуць непрыемнасцяў, калі беларускае пасведчанне кіроўцы згубіцца або яго скрадуць.
Палёгкі для беларусаў
Пры гэтым у тых беларусаў, якія сутыкаліся з пераследам або маюць такую пагрозу, ёсць пэўныя палёгкі. «Partyzanka» рэкамендуе спачатку падавацца на міжнародную абарону. Пасля яе атрымання памяняць правы можна без запыту ў амбасаду.
,,«Гэта адбываецца досыць хутка, цягам недзе двух-пяці тыдняў», – расказала аператарка.
Яна адзначыла, што ў некаторых рэгіёнах Польшчы (напрыклад, у Вроцлаве) мясцовыя самакіраванні дазволілі таксама і ўладальнікам гуманітарных візаў і выдадзеных на іх падставе картаў побыту не запытваць пацвярджэння ў беларускім кансулаце. Аднак у большасці рэгіёнаў Польшчы гэта датычыць толькі асобаў з міжнароднай абаронай.
Тым жа, хто з розных прычынаў не здолее памяняць правы з беларускіх на польскіх, давядзецца нанова вучыцца ў Польшчы. Але гэта абыдзецца нашмат даражэй: калі збор за замену каштуе 500 злотых (128 долараў), то кошт навучання пачынаецца ад 3500 (900 долараў).
«Па магчымасці варта спрабаваць мяняць. Тыя, хто могуць – напрыклад, абмяняць без запыту праз кансулат, або шукаць такія рэгіёны, дзе так можна зрабіць», – сказала суразмоўца.
Нюансы замены правоў
Таксама тым, хто мае статус міжнароднай абароны і выдадзены на падставе гэтага часовы від на жыхарства, рэкамендуюць мяняць правы да таго, як яны атрымаюць дазвол на пастаяннае месца жыхарства на нейкіх іншых падставах, напрыклад, уз’яднання з сям’ёй або працы. Інакш могуць узнікнуць праблемы, бо ў чалавека на руках не будзе карты ВНЖ на падставе міжнароднай абароны – самога рашэння пра гэта часам не дастаткова.
«Да нас ужо звяртаюцца людзі, хто прыехаў у 2020-м і хто не памяняў правы або чакаў нейкага лепшага часу, якія трапляюць у такую дзірку. ВНЖ на падставе міжнароднай абароны ўжо няма, і трэба даказваць, што вы ўсё яшчэ пад абаронай, нягледзячы на тое, што ў вас ёсць сталы побыт, бо рашэнне гэтае бестэрміновае і дае права не рабіць запыты ў беларускі кансулат», – сказала суразмоўца.
Сярод іншых праблемаў, з якімі пры абмене правоў могуць сутыкнуцца беларусы, у тым ліку тыя, хто знаходзіцца ў Польшчы на падставе міжнароднай абароны – гэта дадатковыя пазнакі ў пасведчаннях. У такіх выпадках можа спатрэбіцца дадатковы пераклад з выпіскамі з беларускага заканадаўства, які тлумачыць гэтыя пазнакі.
З інструкцыяй, як падтрымаць «Partyzanka», можна азнаёміцца па спасылцы.
Макар Мыш belsat.eu
