У Жлобіне з'явілася страшная сасіска, якая смажыць іншую сасіску, – скульптура, што выклікала шуміху ў сацсетках. Гэта арт-аб'ект мясцовага мясакамбінату, і там неафіцыйна прызналіся, што ім самым такая творчасць не прыйшлася даспадобы.
Жлобінскі мясакамбінат у сваіх сацсетках адсправаздачыўся, што з нагоды Года добраўпарадкавання паставіў у мясцовым парку «Пяць стыхіяў» «маляўнічую скульптуру»:
«Стваральнікі скульптуры кажуць, што варта толькі дакрануцца ці пацерці сасіскі на мангале, і ўдача павернецца да вас тварам».
У каментарах людзі пішуць, што сасіска аўтарам не вельмі ўдалася:
«Шалапутная сасіска смажыць сваіх дзяцей, цудоўна!»
«Здаецца, гэта лішак солей у арганізме дызайнера».
«Які горад, такія і помнікі».
У Жлобінскім райвыканкаме, куды карэспандэнт «Белсату» патэлефанаваў пад выглядам мясцовага жыхара, ад скандальнай скульптуры адхрысціліся:
«Гэта сасіска мясакамбінату. От хто ставіў, туды і званіце, на прадпрыемства».
На Жлобінскім мясакамбінаце карэспандэнту «Белсату» як прыватнай асобе сказалі, што акурат улады і загадалі прадпрыемству паставіць нейкую скульптуру:
,,«Гэта было заданне райвыканкаму, а мясакамбінат ужо выконваў. Не менавіта такую кампазіцыю паставіць, гаворка ішла, каб ад мясакамбінату нешта было. Мясакамбінат за яе і заплаціў».
Рэакцыю ў сацсетках на прадпрыемстве бачаць:
«Мы чытаем каментары, бачым гэтую сітуацыю».
У кампаніі не выключылі, што «шалапутную сасіску» або паспрабуюць неяк выправіць, або цалкам заменяць:
«Пакуль не ведаем, аднак падымаем гэтае пытанне».
На пытанне, ці спадабалася ім самым гэтая скульптура, на мясакамбінаце прызналіся: «Вядома ж, не».
Дар'я Форман, Сцяпан Кубік belsat.eu
