У Беларусі часткова будуць перакрытыя дарогі агульнага карыстання ў паўднёвых рэгіёнах краіны. Прычына – раптоўнае правяранне гатовасці злучэнняў і вайсковых частак Узброеных сілаў, што пачалося раніцай 21 чэрвеня, паведамляе Мінабароны.
Як адзначылі ў ведамстве, на першым этапе вайсковыя падраздзяленні вырушаць у прызначаныя раёны для выканання розных задачаў.
Гэтым часам дарогі краіны могуць быць часткова перакрытыя дзеля руху вайсковай тэхнікі. Як гаворыцца ў паведамленні, гэта закране найперш Берасцейскую і Гомельскую вобласці. Для правядзення манеўраў задзейнічаюць і палігоны ды ўчасткі мясцовасці.
Пасля гэтага падраздзяленні сілаў спецыяльных аперацыяў, ракетных войскаў, артылерыі, войскаў СПА і ВПС пачнуць выкананне навучальна-баявых задачаў. Тэрмінаў заканчэння правярання Мінабароны не паведамляе.
Раней Дзяржаўны памежны камітэт (ДПК) папярэдзіў пра недапушчальнасць правакацыяў на мяжы з Украінай.
Прычынаю стала тое, што ДПК зафіксаваў у раёне Жытомірскага памежнага атраду канцэнтрацыю розных падраздзяленняў і цяжкага ўзбраення, у тым ліку ракетных комплексаў HIMARS, гаўбіцаў M777 і машынаў «Bradley».
Таксама да сумежнай тэрыторыі сцягваюцца групоўкі спецпадраздзяленняў ГУР Украіны і сілаў спецыяльных аперацыяў, адзначала ведамства.
На ўкраінска-беларускай мяжы атрады нясуць службу ва ўзмоцненым рэжыме.
Ася Саковіч belsat.eu
