Улады апублікавалі спіс дазволенай ІП дзейнасці. Шмат каму давядзецца або закрыцца, або стварыць юрыдычную асобу
Беларускі ўрад апублікаваў пералік відаў дзейнасці, дазволенай індывідуальным прадпрымальнікам. У спісе няма, напрыклад, юрыдычных і маркетынгавых паслуг ды гуртовага гандлю. Іпэшнікам, якія ў пералік не трапілі, давядзецца або закрыцца, або стварыць юрыдычную асобу.
Віды дзейнасці, дазволеныя ІП, апублікавалі на сайце ўрада. Пералік разам з заўвагамі займае пяць аркушаў. Сярод таго, чым індывідуальныя прадпрымальнікі змогуць займацца далей, маецца:
- раздробны гандаль,
- некаторыя будаўнічыя работы,
- абслугоўванне і рамонт аўтаў і матацыклаў,
- грузавыя аўтаперавозы,
- паслугі кароткатэрміновага пражывання,
- грамадскае харчаванне,
- турагенцкая дзейнасць.
Пры гэтым, напрыклад, няма гуртовага гандлю, юрыдычных і маркетынгавых паслуг.
Гэтай жа пастановаю Савет Міністраў зацвердзіў пералік дзейнасці для самазанятых. У ім, сярод іншага, пакінулі рэпетытарства, касметычныя паслугі, паслугі цырульніка, манікюр і педыкюр.
У іпэшнікаў, дзейнасць якіх не далучылі ў пералік, застаецца на выбар або закрыцца, або зарэгістраваць юрыдычную асобу. Вызначаны тэрмін – 31 снежня 2025 года.
Як казала раней «Белсату» эканамістка даследчага цэнтру BEROC Настасся Лузгіна, чарговыя змены для індывідуальных прадпрымальнікаў упісваюцца ў палітыку дзяржавы, скіраваную на ўсё большы кантроль прыватнай сферы і збор усё большых падаткаў:
«Паколькі прадпрымальнікаў шмат і гэта невялікія бізнесы, за кожным наглядчыка не паставіш. Іх кантраляваць складаней. Таму пастараліся іхную колькасць такімі захадамі трохі скараціць».
У статусе ІП працаваць лягчэй: напрыклад, прасцейшы бухгалтарскі ўлік, няма патрабаванняў да мінімальнага капіталу.
«Калі мы разглядаем ІП як стартап, якім чалавек спрабуе запусціць свой бізнес з нескладаным і зразумелым падаткаабкладаннем, то цяпер ён робіцца для многіх проста немагчымым. А людзі, нацэленыя на пашырэнне бізнесу, могуць паспрабаваць адкрыць юрыдычную асобу і развівацца далей. Але трэба разумець, што гэта запатрабуе больш выдаткаў і адказнасці», – падкрэсліла экспертка.
Сцяпан Кубік belsat.eu
