Стала вядома пра беларуса, які загінуў ва Украіне, ваюючы на баку Расеі. Ягоны брат сядзеў «содні» за антываенную акцыю.
Нарадзінец вёскі Расасна Дубровенскага раёну Мікалай Бібчыкаў загінуў яшчэ ў 2022 годзе, але пра гэта стала вядома толькі цяпер са словаў аднавяскоўцаў, піша «Orsha.eu навіны пра Оршу».
Мікалай працяглы час працаваў у Расеі на будоўлі, дзе, верагодна, і быў завербаваны на вайну.
У сацыяльных сетках Бібчыкава ёсць фотаздымкі, дзе ён пазіруе ў вайсковай форме са зброяй у руках.
Як піша тэлеграм-канал, вядома, што родны брат Мікалая ў пачатку вайны атрымаў 10 содняў за тое, што выходзіў з антываенным плакатам да адміністрацыйнага будынку ў вёсцы Баброва.
На сённяшні дзень дакладная колькасць, якія загінулі, ваюючы на баку расейцаў, невядомая.
У перыяд з 2014 да 2021 года на ўсходзе Украіны ў складзе вайсковых фармаванняў непрызнаных ЛДНР бралі ўдзел сотні беларусаў. У 2019-м іхную колькасць ацэньвалі прыблізна 500 чалавек. Згодна са звесткамі ў кнізе «Беларускі Данбас», супраць Украіны з 2014 да 2020 года маглі ваяваць 700–750 беларусаў. У базу звестак баевікоў, створаную супольна КДБ і МУС і апублікаваную ініцыятываю «ByPol», былі залучаныя 140 прозвішчаў.
Раман Шавель belsat.eu