Вынікі пошуку для:

Журналісты за кратамі. Колькі прадстаўнікоў медыяў цяпер у няволі?

Дзясяткі журналістаў знаходзяцца ў няволі. За кратамі з палітычных прычынаў таксама і шэраг блогераў і людзей, звязаных з журналісцкімі справамі. Гэты тэкст быў напісаны 19 траўня 2021 года, але ён пастаянна абнаўляецца, бо журналістаў, фатографаў, блогераў у нашай краіне працягваюць арыштоўваць.


У Беларусі колькасць журналістаў, якія пацярпелі ад пераследу, за год вырасла ў 4,5 разу: летась арыштаваных працаўнікоў медыяў было сямёра, сёлета – дзясяткі. Больш журналістаў у няволі толькі ў Кітаі (50 чалавек), насельніцтва якога ў 155 разоў большае за насельніцтва Беларусі.

Мікрафон тэлеканалу «Белсат». Варшава, Польшча. 1 снежня 2021 года. Фота: ЮШ / Белсат

Арыштаваныя працаўнікі TUT.by [першапачаткова затрымалі 15 асобаў]:

  • Марына Золатава – галоўная рэдактарка TUT.by, СІЗА №1, 220030, Менск, вул. Валадарскага 2;
  • Людміла Чэкіна – генеральная дырэктарка «Тут Бай Медыя», СІЗА №1, 220030, Менск, вул. Валадарскага 2.

У кастрычніку Следчы камітэт распачаў чарговую крымінальную справу супраць працаўнікоў «Тут Бай Медыя» ды іншых асобаў. Падрабязнасцяў у ведамстве не агучвалі.

Кацярына Андрэева і Дар’я Чульцова на судзе. 18 лютага 2021 году. Фота: АВ / Белсат
  • Кацярына Андрэева – журналістка «Белсату», затрыманая 15 лістапада 2020 году, асуджаная на 2 гады пазбаўлення волі за стрым з разгону акцыі памяці забітага Рамана Бандарэнкі. У лютым Кацярыну перавялі ў Гомельскі СІЗА №3 [пісаць лісты можна па адрасе: Гомель, вуліца Кніжная 1А, СІЗА №3, 246003]. 13 ліпеня 2022 года Кацярыне Андрэевай прысудзілі яшчэ 8 гадоў калоніі агульнага рэжыму па артыкуле «здрада дзяржаве». Падрабязней – па спасылцы.
  • Дар’я Чульцова – журналістка «Белсату», затрыманая 15 лістапада 2020 году, асуджаная за рэпартаж з разгону акцыі памяці забітага Рамана Бандарэнкі на 2 гады пазбаўлення волі. Выйшла на волю 3 верасня 2022 года.
  • Ірына Слаўнікава, журналістка Польскага тэлебачання (TVP) і былая афіцыйная прадстаўніца «Белсата» ў Беларусі была затрыманая разам з мужам Аляксандрам Лойкам у менскім аэрапорце ў ноч з 30 на 31 кастрычніка 2021 года. Абодва атрымалі па 15 содняў арышту за «захоўванне на старонках Facebook матэрыялаў «Белсата», якія пазней былі прызнаныя экстрэмісцкімі. Ірына і Аляксандр былі змешчаныя ў СІЗА на Акрэсціна. 15 лістапада сужэнцаў зноў судзілі, нібы за «дробнае хуліганства» – абодвум па выніках судоў далі яшчэ па 15 содняў арышту. Мужа журналісткі трэці раз асудзілі на 15 содняў за нібыта непадпарадкаванне міліцыянтам. 26 лістапада, стала вядома, што Ірына Слаўнікава атрымала статус падазраванай у арганізацыі ды рыхтаванні дзеянняў, што груба парушаюць грамадскі парадак, або актыўным удзеле ў іх (арт. 342 КК РБ). 6 снежня Ірыну перавялі ў СІЗА №1 на вул. Валадарскага, 2, Менск, 220030. Ірыну пачалі судзіць 23 чэрвеня 2022 года.

    3 жніўня 2022 года Гомельскі абласны суд  прызнаў Ірыну вінаватай у арганізацыі дзеянняў, што груба парушаюць грамадскі парадак, і ў стварэнні экстрэмісцкага фармавання ды прысудзіў яе да 5 гадоў калоніі. Нязгоду з такім прысудам выказала кіраўніцтва каналу TVP.
  • Уладзімір Мацкевіч – метадолаг і філосаф, вядомы грамадскі дзеяч і вядоўца праграмы «Размова» на «Белсаце», затрыманы 4 жніўня 2021 года. 23 чэрвеня Уладзіміру Мацкевічу прысудзілі 5 гадоў узмоцненага рэжыму. Цяпер у СІЗА №1, 220030, Менск, вул. Валадарскага 2;
  • Ігар Лосік – блогер («Беларусь головного мозга») і кансультант «Радыё Свабода», затрыманы 25 чэрвеня 2020 г. Лосіка абвінавачвалі ва «ўдзеле ў масавых беспарадках» і «арганізацыі дзеянняў, якія груба парушаюць грамадскі парадак», двойчы трымаў галадоўку. 14 снежня Ігара Лосіка асудзілі да 15 гадоў калоніі ўзмоцненага рэжыму;
  • Ксенія Луцкіна – былая карэспандэнтка дзяржаўнага тэлеканалу «Беларусь–2», сябра асноўнага складу Каардынацыйнай рады, затрыманая 22 снежня 2020 году ў межах «справы Прэс-клубу». 7 ліпеня Справу палітзняволенай журналісткі накіравалі ў Вярхоўны Суд. 28 верасня 2022 года палітзняволеную журналістку асудзілі да 8 гадоў пазбаўлення волі.
  • Андрэй Аляксандраў – журналіст і медыяменеджар, затрыманы 12 студзеня 2021 году ў межах «справы By_help», таксама затрыманая ягоная дзяўчына Ірына Злобіна. Цяпер у СІЗА №1, 220030, Менск, вул. Валадарскага 2. Менскі абласны суд 6 кастрычніка вынес прысуд у «справе БелаПАНу». Андрэй Аляксандраў атрымаў 14 гадоў калоніі ўзмоцненага рэжыму і штраф 32 тысячы рублёў, Ірына Злобіна – 9 гадоў калоніі агульнага рэжыму і штраф 25,6 тысячы рублёў.
  • Дзяніс Івашын – журналіст «Новага часу» і «InformNapalm», затрыманы 12 сакавіка 2021 году і абвінавачаны ва «ўздзеянні на супрацоўніка органаў унутраных спраў з мэтай змены характару яго законнай дзейнасці, цяпер у турме № 1 у Горадні, 230023, вул. Кірава, 1. Ягоная маці ўжо больш за чатыры месяцы не атрымлівае лістоў і паштовак. Суд над палітзняволеным журналістам Дзянісам Івашыным пачаўся 15 жніўня. 14 верасня Дзянісу Івашыну прысудзілі 13 гадоў калоніі ўзмоцненнага рэжыму;
  • Анджэй Пачобут – журналіст «Gazeta Wyborcza», затрыманы 25 сакавіка 2021 году ў межах справы супраць Саюзу палякаў, цяпер у следчай турме № 8, 222160, г. Жодзіна, вул. Савецкая, 22а. КДБ дадаў палітзняволенага журналіста ў спіс «тэрарыстаў».
  • Сяргей Гардзіевіч, журналіст сайта «Першы рэгіён». 2 жніўня 2021 года быў асуджаны паводле трох артыкулаў КК (188, 368 і 369): «за абразу Аляксандра Лукашэнкі», «за абразу супрацоўніка міліцыі» і «за паклёп у дачыненні да супрацоўніка міліцыі». Цяпер у ПК-17, г. Шклоў, 213004, 1-я Завадская, д. 8;
  • Аляксандр Івулін – журналіст Tribuna.com і футбаліст ФК «Крумкачы» быў арыштаваны 3 чэрвеня ў сваёй кватэры і асуджаны на 30 содняў за нібыта сцяг у сваім акне. Пасля 30 содняў ён не выйшаў на волю. Івуліна падазравалі паводле арт. 342 КК РБ («масавыя беспарадкі»). 15 снежня ягоную справу перадалі ў суд. 19 студзеня суддзя Сяргей Шаціла прысудзіў Івуліну 2 гады калоніі агульнага рэжыму, прызнаўшы яго вінаватым у грубым парушэнні грамадскага парадку;
  • Ягор Марціновіч – галоўны рэдактар «Наша Ніва», затрыманы 8 ліпеня. 15 сакавіка яму прысудзілі 2,5 года калоніі агульнага рэжыму;
  • Андрэй Скурко – кіраўнік аддзелу рэкламы і маркетынгу «Наша Ніва». 15 сакавіка яму прысудзілі 2,5 года калоніі агульнага рэжыму;
  • Ірына Леўшына, галоўная рэдактарка агенцыі «БелаПАН», затрыманая 18 жніўня. Праходзіць падазраванай па арт. 342 КК («арганізацыя дзеянняў, якія груба парушаюць грамадскі парадак»), цяпер у у СІЗА №1, 220030, Менск, вул. Валадарскага 2. 6 кастрычніка 2022 года Ірыне Леўшынай прысудзілі 4 гады калоніі агульнага рэжыму.
  • Дзмітрый Наважылаў, былы дырэктар агенцыі «БелаПАН», затрыманы 18 жніўня. Праходзіць падазраваным па арт. 342 КК («арганізацыя дзеянняў, якія груба парушаюць грамадскі парадак»), цяпер у СІЗА №1, 220030, Менск, вул. Валадарскага 2.  6 кастрычніка 2022 года Дзмітрыю Наважылаву прысудзілі 6 гадоў калоніі ўзмоцненага рэжыму і штраф 22,4 тысячы рублёў.
  • Валерыя Касцюгова – палітолаг і аналітык, рэдактарка рэсурсу «Наше Мнение». Валерыю Касцюгову затрымалі 30 чэрвеня 2021 года. Цяпер жанчына ў зняволенні на Валадарцы (СІЗА № 1). Касцюгову вінавацяць у закліках і змове для захопу ўлады. За гэта ёй пагражае да 12 гадоў пазбаўлення волі. [Палітзняволенай можна напісаць на адрас: СІЗА № 1, вул. Валадарскага 2, 220030, Менск];
  • Генадзь Мажэйка, журналіст «Камсамольскай праўды» ў Беларусі». Затрыманы ў ноч з 1 на 2 кастрычніка, заведзеная крымінальная справа паводле ч. 3 арт. 130 («Распальванне сацыяльнай варажнечы») і арт. 369 («Знявага прадстаўніка ўлады») КК. Паводле гэтых артыкулаў Мажэйку можа пагражаць ад 5 да 12 гадоў зняволення. 30 снежня яго перавялі ў СІЗА № 1, вул. Валадарскага 2, 220030, Менск. Справу журналіста перадалі ў суд.
  • Андрэй Кузнечык – фрылансер «Радыё Свабода». Андрэя Кузнечыка затрымалі 25 лістапада, а дома ўчынілі ператрус. Журналіста павінны былі адпусціць з ізалятара на Акрэсціна яшчэ 15 снежня, калі скончыўся ягоны 10-соднявы арышт. Доўгі час ні родным, ні адвакату журналіста не давалі інфармацыі, дзе і ў сувязі з чым яго ўтрымліваюць. 8 чэрвеня Андрэя Кузнечыка асудзілі на 6 гадоў калоніі ўзмоцненага рэжыму – на закрытым судзе прызналі вінаватым у «кіраванні экстрэмісцкім фармаваннем».
  • Алега Груздзіловіча асудзілі на 1,5 года нібыта за арганізацыю масавых беспарадкаў і ўдзел у іх, за кратамі ён прабыў амаль 9 месяцаў. 21 верасня журналіста «Радыё Свабода» вызвалілі з магілёўскай калоніі № 15. Вызвалены на падставе падпісанага прашэння аб памілаванні, але віну ён не прызнаў.
  • Сяргей Сацук – журналіст і рэдактар сайта «Ежедневник». Сацука затрымалі 8 снежня, правялі ў яго ператрус, заблакавалі сайт Ej.by. Пасля допыту яго ўзялі пад варту паводле старой крымінальнай справы паводле артыкулу за «Атрыманне хабару» (арт.430 КК РБ) – у той жа справе, звязанай з расследаваннямі «Ежедневника», Сацука ўжо затрымлівалі ў сакавіку 2020 года. 26 кастрычніка 2022 года галоўнага рэдактара «Ежедневника» прыcудзілі да 8 гадоў калоніі.
  • 26 траўня журналіста Алеся Любенчука забралі з вёскі Крывічы Івейскага раёну, дзе ён жыў апошнім часам. Яму выставілі абвінавачванне ў крымінальнай справе.
  • Дырэктара выдання «Беларусы і рынак» Канстанціна Залатых затрымалі 18 траўня пасля ператрусаў, якія ўчынілі супрацоўнікі КДБ у рэдакцыі і ў кватэры. Залатых абвінавацілі ў «распальванні варожасці, спалучаным з гвалтам, або ўчыненым службовай асобай» (ч. 2 арт. 130 КК). Яго трымаюць у жодзінскім СІЗА.
  • 27 верасня 2022 года адбыўся другі суд над галоўным рэдактарам незалежнага інтэрнэт-выдання «Бабруйскі кур’ер» Анатолем Санаценкам. Гэтым разам яму прысудзілі 14 содняў адміністратыўнага арышту.
  • Алеся Любенчука затрымалі 26 траўня – забралі з вёскі Крывічы Іўеўскага раёну, дзе ён жыў апошнім часам. Прычына затрымання па-ранейшаму не вядомая. Вядома, што ў няволі ў Любенчука пагоршылася здароўе. Суд над журналістам пачаўся 24 кастрычніка 2022 года. 27 кастрычніка 2022 года яму прысудзілі 3 гады калоніі за нібыта «стварэнне экстрэмісцкага фармавання альбо ўдзел у ім»
  • 13 верасня гомельскага журналіста Яўгена Меркіса затрымалі ў межах крымінальнай справы за заклікі да санкцыяў у дачыненні Беларусі.

Акрамя таго, у няволі яшчэ чатыры сябры Беларускай асацыяцыі журналістаў:

  • публіцыст і палітолаг Аляксандр Фядута (затрыманы у межах «справы аб перавароце»), старшыня «Беларускай хрысціянскай дэмакратыі». Яму прысудзілі 10 гадоў турмы.
  • публіцыст і пісьменнік Павел Севярынец (асудзілі на 7 галоў калоніі ўзмоцненага рэжыму за «арганізацыю масавых беспарадкаў»). Павел знаходзіцца ў ПК-17, 213004, г. Шклоў, вул. 1-я Заводская, д. 8.
  • былы ўладальнік «Новай газеты Смаргоні» Рамуальд Улан (асуджаны на 2,5 гады абмежавання волі ва ўстанове адкрытага тыпу за «паклёп» на міліцыянтаў). Знаходзіцца ў папраўчай установе адкрытага тыпу № 17. Барысенка, 13, к. 2, Гомель.
  • праваабаронца Леанід Судаленка (падазраваны ў «арганізацыі і падрыхтоўцы дзеянняў, якія груба парушаюць грамадскі парадак»). 3 лістапада Леаніду Судаленку прысудзілі 3 гады пазбаўлення волі з адбываннем пакарання ў папраўчай калоніі ва ўмовах агульнага рэжыму.

Ілюстрацыйнае фота, затрыманне журналіста Алеся Сабалеўскага. Магілёў, 30 жніўня 2020 году. Фота: Belsat.eu

Беларуская асацыяцыя журналістаў таксама паведамляе пра два напады на журналіста ў канцы студзеня. Імя журналіста па яго просьбе не называюць, але паведамляюць, што першы раз нападнік схапіў журналіста за горла і спрабаваў кудысьці ўцягнуць, але збег пры з’яўленні сведкі, а другі раз два невядомыя ў масках напалі на журналіста, ударылі аб сцяну, пагражалі адносна працы, але ўрэшце збеглі.

«Рэпарцёры без межаў» у 2020 годзе прызналі Беларусь самай небяспечнай краінай Еўропы для журналістаў. Са жніўня па снежань 2020 году арганізацыя налічыла 449 выпадкаў парушэнняў свабоды слова ў Беларусі, 368 журналістаў за той перыяд прайшлі праз арышты. За ўвесь 2020 год Беларуская асацыяцыя журналістаў налічыла 481 затрыманне журналістаў. А з пачатку 2021 году БАЖ налічыла 55 затрыманняў журналістаў і агулам 109 выпадкаў нападу на СМІ.

belsat.eu

Падпісвайся на telegram Белсату

Hавiны