Абвешчаны прысуд журналісту Дзмітрыю Семчанку: тры гады пазбаўлення волі ў калоніі агульнага рэжыму. Аб гэтым паведамляе «Вясна».
23 сакавіка абвешчаны прысуд у справе былога кіраўніка «прэзідэнцкага пулу» дзяржаўнага тэлеканалу АНТ журналіста Дзмітрыя Семчанкі. Яго прызналі вінаватым паводле ч. 1 арт. 130 КК («Распальванне сацыяльнай варожасці ці варажнечы»). Суддзя Яўген Пісарэвіч пакараў журналіста трыма гадамі пазбаўлення волі ў калоніі агульнага рэжыму.
Як паведамляў 22 сакавіка «Белсат», менавіта такі тэрмін запрасіў для Дзмітрыя пракурор. На меркаванне дзяржаўнага абвінавачвання, «учыненае Семчанкам злачынства адносіцца да злачынстваў супраць міру і бяспекі чалавецтва».
Журналіста затрымалі 15 верасня 2022 года разам з жонкай. Пасля двух арыштаў за «дробнае хуліганства» і «распаўсюд экстрэмісцкіх матэрыялаў» на яго завялі крымінальную справу за «распальванне варажнечы». Нагодаю сталі публікацыі ў ягоных сацсетках, якія, на меркаванне сілавікоў, «фармавалі ў грамадскасці нянавісць да супрацоўнікаў праваахоўных органаў, вайскоўцаў і прадстаўнікоў улады».
У 2020 годзе Семчанку ўжо арыштоўвалі на 15 содняў за ўдзел у пратэсным маршы, у той час ён яшчэ працаваў на АНТ. Пасля звальнення з дзяржтэлебачання ён працаваў у кампаніі «Белагра».
Антон Тачняк belsat.eu
