Міністэрства аховы здароўя Беларусі сваёй пастановаю за 27 сакавіка № 32 скасавала пасаду дзіцячага стаматолага. Пра гэта 10 красавіка заявілі ў медычным ведамстве.
Пастанова выключыць пасаду дзіцячага стаматолага мае на мэце «паляпшэнне даступнасці стаматалагічнай дапамогі на ўсіх узроўнях, у тым ліку ў сельскай мясцовасці, за кошт больш шырокага кола дактароў-спецыялістаў стаматалагічнага профілю, здольных яе надаць», паведамілі ў Міністэрстве аховы здароўя.
Абавязкі дзіцячага стаматолага ўскладзеныя на стаматолага-тэрапеўта.
У ведамстве адзначылі, што будучыя стаматолагі ў Беларусі вывучаюць у тым ліку і лекаванне дзяцей, а іхная спецыялізацыя адбываецца толькі падчас інтэрнатуры. Цяпер жа дзве спецыяльнасці інтэрнатуры «Стаматалогія дзіцячая» і «Стаматалогія тэрапеўтычная» будуць таксама аб’яднаныя. Дзякуючы гэтаму «спецыяліст зможа займаць пасаду "стаматолаг-тэрапеўт" у арганізацыях аховы здароўя, якія надаюць медычную дапамогу даросламу і (або) дзіцячаму насельніцтву, у тым ліку ў малалікіх раёнах і сельскай мясцовасці».
У міністэрстве заявілі, што структура (дзіцячыя стаматалагічныя кабінеты, аддзяленні, паліклінікі), сістэма паслядыпломнага рыхтавання дактароў, якія надаюць стаматалагічную дапамогу дзецям, а таксама сістэма надання стаматалагічны дапамогі дзецям не зменяцца.
З 1 лістапада 2023 года ў Беларусі пачалі рэгуляваць тэрапеўтычныя, хірургічныя і артадантычныя стаматалагічныя паслугі. Афіцыйна гэта было зроблена, каб падвысіць іхную даступнасць для насельніцтва. А з 1 ліпеня 2024-га Міністэрства аховы здароўя ўвяло чарговыя новаўвядзенні ў наданне стаматалагічных паслуг.
У сваю чаргу аб’яднанне «Белыя халаты» на падставе размоваў са стаматолагамі з некалькіх беларускіх больніцаў мяркуе, што беларускі стаматалагічны рынак можа расчышчацца пад расейцаў.
Якуб Хруст belsat.eu
