Абраная прэзідэнтка Беларусі ў віншаванні з нагоды Дня медычнага работніка адзначыла, што лекары зрабіліся закладнікамі палітыкі, хаця заслугоўваюць павагі, годных заробкаў і чалавечых умоваў працы. «Я ведаю: прыйдзе час, калі медыкі будуць не падначаленымі, а сапраўднымі аўтарытэтамі», – заявіла Святлана Ціханоўская.
Віншаванне лідаркі апублікаванае ў ейным Telegram-канале. Святлана Ціханоўская канстатавала, што пасля мірнай рэвалюцыі 2020 года шмат медычных работнікаў страцілі працу, зазналі пераслед, былі вымушаныя пакінуць радзіму:
«Я ведаю, як цяжка цяпер працаваць у медыцыне. Медыкі сталі закладнікамі палітыкі. Шмат каго звольнілі, нехта вымушана эміграваў, іншыя сутыкнуліся з пераследам. Тады як рэжым замест падтрымання толькі пагаршае сітуацыю. Беларускіх лекараў прымушаюць уціхую лячыць расійскіх вайскоўцаў, у той час як у нашай краіне паміраюць палітвязні, якім адмаўляюць у медычнай дапамозе».
Абраная прэзідэнтка адзначыла, што беларускія лекары «застаюцца людзьмі нават у невыносных умовах».
«Калі хто і дапамагае хворым, то гэта не рэжым – гэта робіце вы. Менавіта вы, беларускія лекары, – сапраўдная апора нашай медыцыны. Вы застаяцеся людзьмі нават у невыносных умовах. Вы працуеце ў старых шпіталях і паліклініках, са зношаным абсталяваннем і катастрафічным недахопам кадраў, але працягваеце лячыць, слухаць, суцяшаць», – падкрэсліла Ціханоўская.
Яна выказала ўпэўненасць, што ў Новай Беларусі медыкі будуць сапраўднымі аўтарытэтамі, а дзяржава будзе спрыяць іх прафесійнаму росту:
«Я натхняюся вашай стойкасцю і прафесіяналізмам. Вы заслугоўваеце павагі, годных заробкаў і чалавечых умоваў працы. Я ведаю: прыйдзе час, калі медыкі будуць не падначаленымі, а сапраўднымі аўтарытэтамі. Дзе дзяржава будзе спрыяць вашаму росту, а не перашкаджаць. Дзе праца зноў стане захапляльнай справай жыцця, а не штодзённай ахвярай. Дзе вы і вашая праца будуць шанавацца з той жа павагай, з якой вы клапоціцеся пра нашых грамадзянаў».
Сцяпан Кубік belsat.eu
