6 красавіка беларуская мытня заявіла пра затрыманне «найбуйнейшай у гісторыі Беларусі» партыі выбухоўкі, якую спрабавалі прывезці з Польшчы. У Памежнай ахове суседняй краіны назвалі гэта «элементамі дэзынфармацыі».
Мікрааўтобус разам з 41-гадовым кіроўцам затрымалі ў Берасці 2 красавіка. Паводле версіі беларускай мытні, 580 кг выбухоўкі было схавана ў сценках і падлозе «Mercedes». Бус выклікаў падазрэнні падчас сканавання.
Сумежны пункт пропуску «Тэрэспаль» уваходзіць у склад Надбужанскага аддзелу Памежнай аховы Польшчы. Афіцыйны прадстаўнік гэтага аддзелу Дар'юш Сеніцкі ў каментары «Белсату» назваў публікацыі беларускага боку «элементамі дэзынфармацыі»:
,,«Мы не каментуем матэрыялаў, што публікуюць службы Беларусі, разглядаючы іх як элементы дэзынфармацыі».
Беларускае дзяржаўнае тэлебачанне паведамляла, што знойдзеная выбухоўка – асабліва магутная. Імавернаю краінаю вытворчасці названыя ЗША.
Кіроўца Яўген Манько расказаў прапагандыстам, што перавезці гэты мікрааўтобус яго папрасіў знаёмец з Эстоніі Раман, а таму машыну перадаў нейкі Іван, які перарабіў аўта пад аўтадом. Сам бус быў на малдаўскіх нумарах.
Мужчына сцвярджае, што пра «начыненне» салону не ведаў і што яго выкарысталі ўцёмную. На кіроўцу завялі крымінальную справу, яму пагражае да 10 гадоў.
Гэта, дарэчы, не першая справа супраць Манько. Як паведамілі «Белсату» ў арганізацыі «BELPOL», у 2008 годзе яго абвінавачвалі ў гандлі наркотыкамі, аднак тую справу закрылі праз адсутнасць складу злачынства.
Яўген Манько нарадзіўся ў Львове, вышэйшую адукацыю атрымаў у Баранавіцкім дзяржуніверсітэце. Прапісаны ва ўласнай кватэры ў Баранавічах разам з жонкаю, настаўніцаю англійскай мовы, і дваімі дзецьмі.
У 2004 годзе мужчына зарэгістраваўся як індывідуальны прадпрымальнік, займаўся грузавым транспартам, у тым ліку перавозам аўтаў.
Лукашэнкаўская прапаганда сцвярджае, што мікрааўтобус пераганялі з Літвы ў Расею. У гэтай гісторыі пабачылі «ўкраінскі почырк з заходнім налётам», намякаючы, што выбухоўка магла быць выкарыстаная «для тэракту», маштабам падобным да падрыву Крымскага мосту.
Паведамленні пра знаходку на мяжы Беларусь распаўсюдзіла за дзень да візіту ў Маскву прэм'ер-міністра Аляксандра Турчына, які меўся абмеркаваць умовы паставак расейскай нафты на беларускія заводы. Аляксандр Лукашэнка падчас паездкі ў Маскву ў сярэдзіне сакавіка скардзіўся, што нафтаперапрацоўчыя прадпрыемствы ў Мазыры і Наваполацку стратныя, бо дарагая сыравіна.
Перад ад'ездам Турчына ў Расею Лукашэнка запэўніў, што прынцыпова дамовіўся з Уладзімірам Пуціным пра цану нафты для Беларусі і даў наказ прэм'еру канчаткова ўладкаваць гэтае пытанне.
Ці выканаў Турчын той загад, пакуль невядома. У паведамленнях дзяржаўных медыяў наконт вынікаў візіту – ані слова пра нафту.
Пры гэтым у Менску пахваліліся, што Пуцін у размове з Лукашэнкам 7 красавіка «падзякаваў за затрыманне найбуйнейшай партыі асабліва небяспечнага грузу – выбухоўкі», якую намагаліся правезці ў Расею.
Пуцін «папрасіў перадаць падзяку і, наколькі магчыма, падтрымаць адмыслоўцаў і экспертаў, якія знайшлі ды ідэнтыфікавалі небяспечны груз».
Спікер Крамля Дзмітрый Пяскоў пра гэтую падзяку не згадаў. Паводле яго, палітыкі «абмеркавалі бягучыя пытанні ўзаемадзеяння дзвюх краінаў».
«Была таксама закранутая тэма супрацы спецыяльных службаў Расеі і Беларусі ў змаганні з тэрарызмам», – сказаў прэс-сакратар Пуціна.
Падобная гісторыя адбылася ў 2017 годзе, калі на мяжы з Украінаю нібыта затрымалі джып са зброяй. У крымінальнай справе было напісана, што за стырном быў грамадзянін Беларусі Аляксандр Іванавіч Новікаў, які «паводле папярэдняй змовы з нявызначанымі асобамі незаконна мінуў мяжу Рэспублікі Беларусь».
Аднак «BELPOL» даведаўся, што насамрэч мужчыну завуць Сяргей Аляксандравіч Балобін, у той час ён працаваў у цэнтральным апараце КДБ.
Дар'я Форман, Сцяпан Кубік belsat.eu
