Беларусь – ключавы фактар бяспекі Еўропы, ад яе дэмакратызацыі залежыць будучыня рэгіёну. Пра гэта 23 траўня на прэс-канферэнцыі ў Польскім прэсавым агенцтве (PAP) заявіла дэмакратычная лідарка Беларусі Святлана Ціханоўская. PAP называе яе абранаю прэзідэнткаю.
У выступе Святлана Ціханоўская падзякавала Польшчы за адкрыццё ў 2020 годзе «сваіх сэрцаў і дамоў для беларусаў, якім давялося пакінуць краіну».
«Сёння вы нашыя самыя вялікія саюзнікі. Польшча вельмі добра разумее Беларусь, бо 40 гадоў таму вы таксама перажылі падобную сітуацыю і здабылі свабоду», – сказала палітычная дзяячка.
Ціханоўская адзначыла, што ўлады Аляксандра Лукашэнкі і Расея «ўкладаюць велізарныя грошы ў інфармацыйны працэс», «засмечваюць свядомасць Беларусі інфармацыяй пра тое, што Украіна – наш вораг, што Польшча памірае».
,,«Калі ў нас не будзе альтэрнатыўных медыяў, нам будзе вельмі цяжка стрымаць гэтыя прапагандысцкія паведамленні. Вось чаму я заўсёды заклікаю нашых дэмакратычных партнёраў падтрымліваць перадусім медыі вольнай Беларусі. І мы вельмі ўдзячныя Польшчы за фінансаванне «Белсату» і іншых медыяў», – сказала яна.
Яна выказала спадзеў, што змены ў Беларусі адбудуцца як найхутчэй і «дакладна прыйдуць хутчэй, чым у Расеі». Пры гэтым Ціханоўская адзначыла, што не ведае, калі змены могуць адбыцца ў Беларусі. Паводле яе, гэта можа быць звязана з заканчэннем вайны ва Украіне, з эканамічнаю сітуацыяй у Беларусі або праваламі палітыкі Лукашэнкі, «ці нешта можа адбыцца ў Расеі».
«Нашая задача – быць гатовымі да гэтага моманту, мець моцныя інстытуты, моцныя дэмакратычныя сілы», – сказала яна.
Пуцін і Лукашэнка патрэбныя адзін аднаму
Ціханоўская назвала Беларусь ключавым фактарам бяспекі і будучыні Еўропы ў цэлым і Украіны ў прыватнасці. Яна адзначыла, што ўлада
Аляксандра Лукашэнкі дапамагла Уладзіміру Пуціну напасці на Кіеў, шантажаваць Польшчу і краіны Балтыі, абыходзіць санкцыі. Пуцін жа ёсць гарантам улады Лукашэнкі і дазваляе ўзбагачацца на вайне супраць Украіны.
«Вось чаму Пуціну так патрэбны Лукашэнку. Яны патрэбныя адзін аднаму. З дапамогаю Лукашэнкі Пуцін кантралюе Беларусь», – сказала дэмакратычная лідарка. Яна падкрэсліла неабходнасць прыцягнення Лукашэнкі і Пуціна да адказнасці за ўчыненыя імі злачынствы. Ціханоўская нагадала, што Рада Еўропы абвясціла стварэнне адмысловага трыбуналу ў справе вайны ва Украіне, а Літва падала пазовы супраць Менску ў Міжнародны крымінальны суд і Міжнародны суд ААН. Палітык заклікала Польшчу ды іншыя краіны падтрымаць гэтыя звароты.
,,«Без адказнасці не будзе бяспекі. Дыктатары павінны ведаць, што ўсе іхныя злачынствы задакументаваныя і што вінаватыя будуць пакараныя», – заявіла яна.
Ціханоўская адзначыла, што беларускія дэмакратычныя сілы вывучаюць досвед Польшчы ды іншых краінаў адносна дэмакратычных зменаў, у тым ліку люстрацыі і перамоваў з чыноўнікамі, правядзення вольных выбараў і рыхтавання новага заканадаўства і рэформаў.
,,«Мірныя перамовы ў справе Украіны могуць прывесці да цалкам новай сітуацыі. У выпадку спынення агню ўсе позіркі зноў будуць звернутыя ў бок Беларусі. Або Расея паспрабуе працягнуць яшчэ больш жорсткі кантроль над Беларуссю, або нам удасца выйсці з-пад расейскага ўплыву», – заявіла яна.
Паводле яе, калі мір будзе дасягнуты на ўкраінскіх умовах, тады «ўдасца аслабіць Пуціна, гэта аслабіць і Лукашэнку». Для вызвалення Беларусі спатрэбіцца вельмі моцнае міжнароднае падтрыманне, у тым ліку краінаў Еўропы і ЗША. Яна расказала, што падчас візіту ў Вашынгтон заклікала той «быць цвёрдым з Пуціным, не паддавацца на ягоныя гульні», падкрэслівала пагрозы, якія сыходзяць з Менску для ЗША. Ціханоўская падтрымала намаганні Еўрапейскага Звязу і Польшчы ўмацаваць уласную бяспеку, «бо гэта таксама нашая Еўропа, і мы хочам, каб у Еўропе панавалі мір і бяспека».
Дэмакратычная лідарка таксама заклікала замежныя ўрады патрабаваць вызвалення беларускіх палітвязняў. Яна адзначыла: дэмакратычныя сілы нядаўна звярнуліся да Ватыкану і ААН дзеля гэтага.
,,«Я мяркую, што Беларусь можа і павінна змяніць геапалітычнае аблічча свету. Патрэбныя санкцыі супраць Крамля і патрэбныя гарантыі для Украіны. Гэта павінна стаць гарантыяй бяспекі для Польшчы, Еўропы і Літвы. Дэмакратыя не ёсць дадзенасцю. Дэмакратыю неабходна абараняць, а сёння дэмакратыя пад пагрозаю», – сказала Ціханоўская.
Ціханоўская пра Мельнікаву: М не ведаем, што з ёй адбываецца
Ужо па выступе, адказваючы на пытанне пра знікненне спікеркі Каардынацыйнай рады Анжалікі Мельнікавай, палітычная дзяячка адзначыла, што не хоча спекуляваць у гэтай тэме, «бо мы не ведаем, што з ёй адбываецца». Яна адзначыла, што польскія службы займаюцца гэтым пытаннем, бо Мельнікава атрымала польскае грамадзянства, «таму ў іх можа быць нейкая інфармацыя, якую нельга выдаваць, бо расследаванне яшчэ працягваецца».
Ціханоўская заявіла, што не ведае нічога новага пра Мельнікаву. Паводле яе, калі ў польскіх спецслужбаў зʼявяцца дадатковыя звесткі, «медыі таксама пра гэта даведаюцца».
Якуб Хруст belsat.eu
