«BYPOL» бярэ ўдзел у расследаванні выданнямі «Polityka» і «The Insider» знікнення спікеркі Каардынацыйнай рады Анжалікі Мельнікавай. Кіраўнік арганізацыі Аляксандр Азараў расказаў «Белсату» дадатковую інфармацыю адносна працаўніка спецслужбаў Аляксея Лабеева, які, як заяўляюць, стаўся каханкам зніклай спікеркі.
Аляксандр Азараў адзначыў, што Аляксей Лабееў – супрацоўнік упраўлення вайсковай контрвыведкі КДБ як мінімум на 2021 год. Ён скончыў вайсковы факультэт Беларускага дзяржаўнага ўніверсітэту, выпускнікі якога размяркоўваюцца ў асноўным у ГРУ, КДБ або Міністэрства абароны перакладнікамі і вайсковымі карэспандэнтамі. Быў пераведзены спачатку служыць у Горадню, дзе ёсць вайсковая частка 22410 ГРУ. Пасля – у Менск.
У 2021 годзе Лабееву выдалі пашпарт прыкрыцця. Адбылося гэта за месяц да правакацыі ў дачыненні прапагандыста Грыгорыя Азаронка.
,,«Паводле нашай інфармацыі, грамадзянін Лабееў браў удзел у гэтай правакацыі. Ён атрымаў пашпарт прыкрыцця за месяц да ўдзелу ў ёй. З гэтым пашпартам, як мяркуецца, браў удзел у гэтай правакацыі і быў адным са сведак у крымінальнай справе. А Анжаліка, мы так разумеем, – ягоная наступная распрацоўка», – сказаў Азараў.
Нагадаем: 2 ліпеня 2021 года Аляксандр Лукашэнка расказаў, што пратэстоўцы хацелі «знерухоміць, захапіць, кінуць у багажнік» прапагандыста Азаронка, «вывезці ў лес у самае глухое месца, адрэзаць язык». Затым былі апублікаваныя кадры нападу, знятыя з некалькіх ракурсаў, у тым ліку з машыны нападніка – таксоўца з Ліды Дзмітрыя Сасноўскага. Яго затрымалі яшчэ да таго, як ён дайшоў да Азаронка. Як выявілася пазней, супрацоўнікі спецслужбаў прывезлі яго да прапагандыста сваёй машынай і выдалі электрашокер. Забіваць Азаронка або адразаць язык ніхто таксама не збіраўся – з ім хацелі запісаць «пакаяннае» відэа. За гэта Сасноўскі атрымаў 20 гадоў зняволення.
Кіраўнік «BYPOL» адзначыў, што ў 2020 годзе ўсім спецслужбам у Беларусі былі пастаўленыя задачы працаваць з пратэстоўцамі і стварыць гучныя справы, каб скампраметаваць іх. У тым ліку гэтым займалася вайсковая выведка і вайсковая контрвыведка КДБ Беларусі. Пасля таго, як справакаваных і скампраметаваных пратэстоўцаў затрымлівалі, арганізатары з крымінальнай справы знікалі або выступалі ў якасці сведак, у тым ліку пад змененымі звесткамі.
За акцыю з Азаронкам Лабееў атрымаў дзяржаўную ўзнагароду, сказаў Азараў.
Прыкметаў выкрадання не выявілі
Кіраўнік «BYPOL» расказаў, што расследаванне знікнення Мельнікавай працягваецца. Паводле яго, невядома, дзе і калі адбылося вербаванне.
,,«Мы прытрымліваемся версіі, што менавіта яе завербавалі ўжо пасля [знаёмства з Лабеевым. – Заўвага рэд. belsat.eu]. Яна не была агенткаю, на нашую думку. Яе завербавалі ўжо ў працэсе», – сказаў Азараў.
Паводле яго, прыкметаў прымусу, выкрадання, вывазу Мельнікавай не выяўлена. Яна дзеяла самастойна, але давядзецца высветліць, ці не пад пагрозамі і шантажом.
Спікерка Каардынацыйнай рады Анжаліка Мельнікава пакінула тэрыторыю Польшчы і Еўразвязу 26 лютага 2025 года, паляцела ў Лондан. Паводле расследавальнікаў, за дзень да вылету зарэзервавала пражыванне ў пяцізоркавым гатэлі на Шры-Ланцы, дзе ўжо бывала раней. З 28 лютага да 7 сакавіка Мельнікава жыла ў тым гатэлі з дзецьмі. 7 сакавіка Мельнікава і паляцела з імі ў Дубай, там ейны след губляецца.
Паводле «Кіберпартызанаў», 5, 18 і 24 сакавіка з рахунку фонду Мельнікавай былі выведзеныя вялікія сумы грошай, што прызначаліся для «Кіберпартызанаў» і Каардынацыйнай рады – агулам з рахунку вывелі $ 150 тысяч.
Пасля гэтага кантактавала з паплечнікамі з Каардынацыйнай рады праз відэасувязь, але не праз асабістыя сустрэчы: казала, што хварэе. 25 сакавіка перастала выходзіць на сувязь. 13 сакавіка ейны тэлефон выкарыстоўвалі для доступу да файлаў Каардынацыйнай рады з беларускага IP-адрасу – імаверна, тэлефон быў на тэрыторыі Беларусі. У Польшчы трывае расследаванне ейнага знікнення, падазраюць незаконнае пазбаўленне волі.
Расследавальнікі сцвярджаюць, што зніклая спікерка Каардынацыйнай рады сустракалася і лятала ў адпачынак з Аляксеем Лабеевым, які працаваў на спецслужбы Беларусі і меў пашпарт прыкрыцця на іншае прозвішча.
Гісторыя, падобная да апісанай расследавальнікамі, адбылася з Аляксандраю Каско. Як сцвярджалі сілавікі, яна год камунікавала з супрацоўнікам ГУБАЗіКу, а пасля вярнулася ў Беларусь і была пакараная 10 гадамі зняволення.
