Расследавальнікі сцвярджаюць, што зніклая спікерка Каардынацыйнай рады сустракалася і лятала ў адпачынак з чалавекам, які працаваў на спецслужбы Беларусі і меў пашпарт прыкрыцця на іншае прозвішча.
Зніклая ў сакавіку спікерка Каардынацыйнай рады Анжаліка Мельнікава мела каханка, які аказаўся агентам спецслужбаў Беларусі, заявілі ў супольным расследаванні польскае выданне «Polityka» і расейскае «The Insider». Паводле іх, каханкам аказаўся 32-гадовы Аляксей Вітальевіч Лабееў, які меў пашпарт прыкрыцця на імя Аляксей Гардзееў.
Арганізацыя «BELPOL» пацвердзіла «Белсату», што такі чалавек існуе: Лабееў нарадзіўся ў Слоніме, жыў у Горадні, меў пашпарт прыкрыцця на такое імя. Лабееў жанаты, вядомае і імя ягонай жонкі.
Мельнікава была замужам, але ў 2021 годзе, калі пераехала ў Польшчу, ужо казала, што разжаняецца. Паводле расследавальнікаў, Мельнікаву сталі бачыць з іншымі мужчынамі, хоць у 2024-м яна раптам стала жыць у адной кватэры з былым мужам. Калегам яна казала, што яны спяць у розных пакоях і разам гадуюць дзяцей. Разам з тым, у 2024-м яна расказвала сябрам пра заручыны з мужчынам, які «жыве ў Беларусі і не можа прыязджаць у краіны Еўразвязу, таму яны сустракаюцца ў экзатычных краінах». На фота ў сацыяльных сетках расследавальнікі заўважылі новы пярсцёнак на пальцы Мельнікавай.
Не пазней за 2023 год Мельнікава пачала сустракацца з Лабеевым, пішуць расследавальнікі. З 26 жніўня да 5 верасня 2023-га яны разам ляталі на Кубу (пра палёт, але не пра каханка, яна расказвала паплечнікам). Лабееў купіў для Мельнікавай квіткі на Кубу з Масквы, але яна пастанавіла ляцець з Еўропы, а з Масквы на Кубу з ейнымі квіткамі паляцела ейная маці. 16–21 студзеня Лабееў лятаў на Шры-Ланку, там жа ў гэтыя дні была і Мельнікава. Расследавальнікі кажуць, на Шры-Ланцы Лабееў зрабіў Мельнікавай прапанову выйсці за яго і падарыў пярсцёнак. Сяброўка Мельнікавай кажа, што тая расказвала пра заручыны, паказвала фота каханага і пярсцёнак, казала, што хлопец з Беларусі, спартовец.
Са студзеня 2025 года, паводле знаёмых, Мельнікава была нечым моцна расстроеная, у яе бывалі нервовыя зрывы, яна набрала вагу, плакала і казала, што ў яе праблемы. На працы гэтага амаль ніхто не заўважыў, кажуць расследавальнікі.
Пра Лабеева вядома няшмат. Нарадзіўся ў сям’і беларускага вайскоўцаў у 1993 годзе («BELPOL» пацвердзіў «Белсату» дату нараджэння), скончыў Вайсковы факультэт БДУ. Жыў непублічным жыццём, сацсетак не вёў (на старым і закінутым акаўнце ў «VK» пазначыў, што скончыў Навасібірскі дзяржаўны тэхнічны ўніверсітэт, але ці праўда ён там вучыўся, невядома).
Адойчы Лабееў «засвяціўся» на фота з удзелам беларускіх вайскоўцаў у шпіталі ў Горадні ў 2019 годзе; на тым жа фота быў тагачасны кіраўнік Галоўнага выведнага ўпраўлення Руслан Касыгін.
На фота з вяселля Лабеева бачныя два ягоныя сябры, вайскоўцы з Вайсковага факультэту БДУ. Адзін з іх, Анатоль Жалноў, трапіў на фота, на якім тагачасны кіраўнік Генеральнага штабу Узброеных сілаў Беларусі ўручае пісталет «ТТ» протаіерэю.
Якая спецслужба выдала яму пашпарт прыкрыцця, невядома: расследавальнікі дапускаюць, што гэта магло быць як ГРУ, так і Камітэт дзяржаўнай бяспекі. У любым разе, яны сумняюцца, што заручыны Мельнікавай скончацца вяселлем.
***
Спікерка Каардынацыйнай рады Анжаліка Мельнікава пакінула тэрыторыю Польшчы і Еўразвязу 26 лютага 2025 года, паляцела ў Лондан. Паводле расследавальнікаў, за дзень да вылету яна забранявала пражыванне ў пяцізоркавым гатэлі на Шры-Ланцы, дзе ўжо бывала раней. З 28 лютага па 7 сакавіка Мельнікава жыла ў тым гатэлі з дзецьмі. 7 сакавіка Мельнікава з дзецьмі паляцела ў Дубай, там ейны след губляецца.
Паводле «Кіберпартызанаў», 5, 18 і 24 сакавіка з рахунку фонду Мельнікавай былі выведзеныя вялікія сумы грошай, што прызначаліся для «Кіберпартызанаў» і Каардынацыйнай рады – агулам з рахунку вывелі 150 тысяч долараў.
Пасля гэтага кантактавала з паплечнікамі з Каардынацыйнай рады праз відэасувязь, але не праз асабістыя сустрэчы: казала, што хварэе. 25 сакавіка перастала выходзіць на сувязь. 13 сакавіка ейны тэлефон выкарыстоўвалі для доступу да файлаў Каардынацыйнай рады з беларускага IP-адрасу – імаверна, тэлефон быў на тэрыторыі Беларусі. У Польшчы трывае расследаванне ейнага знікнення, падазраюць незаконнае пазбаўленне волі.
Гісторыя, падобная да апісанай расследавальнікамі, адбылася з Аляксандрай Каско. Як сцвярджалі сілавікі, яна год камунікавала з супрацоўнікам ГУБАЗіКу, а пасля вярнулася ў Беларусь і была пакараная 10 гадамі зняволення.
Алесь Наваборскі belsat.eu
