Упершыню з 2022 года Вашынгтон наведаў даволі высокапастаўлены расейскі чыноўнік – кіраўнік Расейскага фонду наўпроставых інвестыцыяў, спецыяльны прадстаўнік прэзідэнта РФ у эканамічнай супрацы з замежнымі краінамі Кірыл Дзмітрыеў. Там ён правёў шэраг сустрэчаў з прадстаўнікамі кіраўніцтва Белага дому, у тым ліку Стывам Ўіткафам – спецыяльным пасланнікам Доналда Трампа ў Блізкім Усходзе.
Адзіны вынік гэтае паездкі на цяперашні момант – васьміхвіліннае інтэрв’ю Кірыла Дзмітрыева расейскім журналістам, што змяшчае вось такія словы: «Мы бачым, што ўжо дасягнуты значны прагрэс. Напрыклад, пад кіраўніцтвам прэзідэнта Расеі Уладзіміра Пуціна і прэзідэнта ЗША Доналда Трампа дасягнутае пагадненне аб, фактычна, ненанясенні ўдараў па энергетычнай інфраструктуры паміж Расеяй і Украінаю, што, безумоўна, першы такі крок у дээскалацыі ўкраінскага канфлікту».
,,Нават не буду казаць пра танныя маніпуляцыі дэфініцыямі кшталту «ўкраінскі канфлікт» (што гэта за дзіўны «ўкраінскі канфлікт» такі, калі дасягаюцца дамоўленасці паміж Украінай і Расеяй аб ненанясенні ўдараў па энергетычных аб’ектах адно аднаго?), бо ў гэтай заяве ёсць больш характэрны пасаж: «пад кіраўніцтвам прэзідэнта Расеі Уладзіміра Пуціна і прэзідэнта ЗША Доналда Трампа».
Апошнімі днямі расейскія афіцыйныя асобы, а за імі і ўся прапагандысцкая машына Крамля, масава выдаюць заявы, сэнс якіх зводзіцца прыблізна да наступнага: Расея і ЗША прыкладаюць супольныя намаганні для найхутчэйшага ўсталявання міру насуперак іншым актарам, якія ўсялякім чынам спрабуюць перашкодзіць гэтаму працэсу.
І вось жа іронія, што ў расейскага пісьменніка і дзяржаўнага дзеяча пачатку ХІХ стагоддзя таксама з прозвішчам Дзмітрыеў ёсць байка, якая практычна даслоўна пераказвае наратыў пуцінскага Дзмітрыева-чыноўніка. Твор датуецца 1805 годам і называецца «Бык і Муха». Вось урывак:
«Бык с плугом на покой тащился по трудах;
А Муха у него сидела на рогах,
И Муху же они дорогой повстречали.
«Откуда ты, сестра?» — от этой был вопрос.
А та, поднявши нос,
В ответ ей говорит: «Откуда? — мы пахали!»
,,То бок прайшло 220 гадоў, а ў Расеі падобныя метады не проста квітнеюць, а выходзяць у дзяржаўны мэйнстрым. Роўна гэткім самым чынам, як тая муха быка, цяпер крамлёўскія палітыкі імкнуцца асядлаць ініцыятывы Злучаных Штатаў ды прымазацца да іх пазіцыі: маўляў, гэта мы разам дабіваемся мірнага ўрэгулявання ды спынення агню.
Асабліва нахабныя персанажы кшталту Сяргея Лаўрова ўвогуле спрабуюць выдаць свае хацелкі за імкненне адміністрацыі Доналда Трампа!
Напрыклад, пуцінскія чыноўнікі ды падкантрольныя ім медыя спрабуюць стварыць уражанне, што ЗША патрабуюць ад краінаў Еўропы не павялічваць абарончыя выдаткі ды адмовіцца ад падтрымання Украіны, хоць у рэальнасці сітуацыя выглядае цалкам адваротным чынам. Таксама прапагандысты ўва ўсе галасы трубяць пра тое, што мірныя ініцыятывы Доналда Трампа тарпедуюцца краінамі Еўрапейскага Звязу ды афіцыйным Кіевам: нібыта гэта ўкраінцы цяпер парушаюць дамоўленасці аб ненападзенні на аб’екты энергетычнай інфраструктуры.
Падобна, гэтую ж лухту расейцы спрабуюць прадаць і амерыканскай аўдыторыі: глядзіце, Украіна не паважае Доналда Трампа, парушаючы дамоўленасці, дасягнутыя ягонымі намаганнямі! А таму трэба дабівацца змены ўлады ў Кіеве і ўвогуле ўсталяваць там вонкавае кіраванне. З удзелам Расеі, вядома ж.
У гэтую ж катэгорыю трапляюць і заявы вышэй згаданага Дзмітрыева пра абмеркаванне з амерыканскім бокам аднаўлення авіяпералётаў паміж Расеяй і ЗША. Што праўда, на наступны дзень гэтыя словы былі зняпраўджаныя самым Маркаў Руб'ёў: аніякіх такіх размоваў не вялося. Здаецца, амерыканскаму быку не надта падабаецца, што пахаць разам з ім збіраецца надакучлівая расейская муха.
