Уладальнік Telegram Павел Дураў паведаміў у сваім акаўнце, што адна з краін Заходняй Еўропы спрабавала ўмяшацца ў працу Telegram і запатрабавала абмежаваць доступ да палітычных каналаў румынскіх кансерватараў перад прэзідэнцкімі выбарамі ў Румыніі.
Павел аДураў напісаў, што адмовіўся гэта рабіць, падкрэсліўшы, што Telegram не будзе парушаць свабоду слова ці блакаваць карыстальнікаў з-за іх палітычных поглядаў.
,,«Заходнееўрапейскі ўрад... звярнуўся да Telegram з просьбай прымусіць нас заглушыць кансерватыўныя галасы ў Румыніі напярэдадні сённяшніх прэзідэнцкіх выбараў. Я катэгарычна адмовіўся. Telegram не будзе абмяжоўваць свабоды румынскіх карыстальнікаў або блакаваць іх палітычныя каналы. Нельга «абараняць дэмакратыю», знішчаючы дэмакратыю. Нельга «змагацца з умяшаннем у выбары», умешваючыся ў выбары. У вас альбо ёсць свабода слова і справядлівыя выбары, альбо іх няма. І румынскі народ заслугоўвае і аднаго, і другога», – напісаў Дураў.
Што гэта за заходнееўрапейская краіна, Дураў не напісаў, але побач са словамі пра яе ўрад паставіў эмодзі багета – што нібыта дае намёкі на Францыю.
Абноўлена. Міністэрства замежных спраў Францыі катэгарычна абвергла абвінавачанні ва ўмяшанні ў прэзідэнцкія выбары ў Румыніі. У афіцыйнай заяве адзначаецца, што ў Telegram і сацсетцы X распаўсюджваюцца «цалкам неабгрунтаваныя абвінавачанні» ў нібыта спробах Францыі паўплываць на палітычны працэс у Румыніі. Французскі МЗС падкрэсліў, што такія заявы непраўдзівыя і заклікаў «усіх праяўляць адказнасць і павагу да румынскай дэмакратыі».
У ведамстве нагадалі, што першы тур прэзідэнцкіх выбараў у Румыніі, які адбыўся ў снежні 2024 года, быў ануляваны ўладамі «суверэнна» пасля «рэальнага замежнага ўмяшання» з боку суб’ектаў, звязаных з Расеяй.
Парыж падкрэсліў, што Францыя была і застаецца партнёрам і сябрам Румыніі, падтрымлівала яе ўступленне ў Еўразвяз, правядзенне рэформаў, далучэнне да Шэнгенскай зоны і агульны прагрэс. «Хлусіць пра Францыю, абражаць яе – значыць разбураць гэтую гісторыю», – заявілі ў французскім МЗС.
Нагадаем, што сёння ў Румыніі праходзіць другі тур прэзідэнцкіх выбараў, у якіх змагаюцца за прэзідэнцкае крэсла мэр Бухарэсту Нікушора Дана і прадстаўніка ультраправых сіл Джорджэ Сім’ёна, на якога, паводле палітычнага аналітыка Аляксандра Фрыдмана, ставіць Расея і ЗША (адпаведна, на Дана сваю стаўку робіць Еўразвяз).
Раман Шавель belsat.eu
