Тое, што 78-гадовую Ніну Багінскую будуць судзіць па крымінальным артыкуле, не стала нечаканасцю для тых, хто ведае гэтую мужную і прынцыповую жанчыну. Ніна Багінская стала своеасаблівым сімвалам пратэстаў 2020-га. Крымінальная справа супраць актывісткі пакуль ляжыць у канцылярыі Першамайскага суда сталіцы. Грамадскасць, як і сама Ніна Багінская, ведае дакладна адзін артыкул абвінавачання – 342 з нататкай 2 Крымінальнага Кодэксу Беларусі. Вядома, што крымінальную справу актывістка «зарабіла» шматлікімі затрыманнямі і адміністрацыйнымі судамі.
У крымінальнай справе супраць Ніны Багінскай фігуруюць пратаколы і судовыя пастановы толькі за 2024 год. У красавіку яе затрымалі двое міліцыянтаў недалёка ад дому ў Першамайскім раёне сталіцы за маленькі значок на каўнерыку паліто з нацыянальнай сімволікай. Не прайшло і месяца, як Ніну Багінскую затрымалі зноўку, але каля Камароўскага рынку і даставілі ў міліцыю Савецкага раёну. Там таксама фігураваў маленькі значок на вопратцы. Новае затрыманне адбылося 25 жніўня. У той раз пратакол быў складзены ў міліцыі Першамайскага раёну за аналагічнае «правапарушэнне». Літаральна праз два тыдні, 6 верасня, новае затрыманне – не за значок, а за бел-чырвона-белую нашыўку. Папросту значкі скончыліся. Падчас затрымання ўсе значкі міліцыянты ў Ніны забіралі і не вярталі. Што яны з імі потым рабілі – невядома. Таму Ніна Багінская стала рабіць нашыўкі. Гэта зняць было ўжо не так проста. Адну нашыўку яна зрабіла ў гонар стварэння партыі БНФ – сцяжок, а на белым фоне ў цэнтры чырвонымі ніткамі было вышытае «БНФ».
Апошні пратакол у 2024 быў складзены за майку з надпісам: «Не вайне!». Ніну Багінскую затрымалі на выхадзе са станцыі метро, калі яна ехала на дачу. Супрацоўнікі міліцыі трымалі пенсіянерку некалькі гадзін у Першамайскім РУУСе. Відаць, увесь гэты час высвятлялі па якім артыкуле складаць пратакол. Яны патлумачылі жанчыне, што антываенны надпіс на майцы супярэчыць курсу палітыкі дзяржавы Рэспублікі Беларусь. З гэтым сёння ўжо ці наўрад і паспрачаешся. Але ў выніку сума штрафаў склала 180 базавых велічынь.

Калі яшчэ ўлічыць, што раней з-за штрафаў у пенсіянеркі забралі дачу, зямельны надзел, на якім яна вырошчвала гародніну, гадамі забіраюць больш за палову пенсіі, каб уносіць грошы ў кошт пагашэння штрафаў, становіцца зразумела, што для яе азначае дадатковыя 7560 рублёў. Але Ніна лічыць сваім абавязкам паказваць уладам і грамадству сваё стаўленне да тых падзеяў, якія адбываюцца ў краіне. Акрамя таго, яна прынцыпова адмаўляецца плаціць за карыстанне грамадскім транспартам. Багінская тлумачыць кантралёрам, што сума яе штрафаў у бюджэт даўно пакрыла кошт білетаў. Ёй летась давялося двойчы прайсці судова-псіхіятрычныя экспертызы, якія прызналі яе дзеяздольнай.
Але крымінальная справа па так званым народным артыкуле для Ніны Багінскай можа абярнуцца сапраўднай трагедыяй. Праблема заключаецца ў тым, што пракуратура ў абвінавачанні ўжыла тую частку 342-га артыкула, па якім прадугледжана пакаранне ў выглядзе арышту, абмежавання волі, так званая «хімія, альбо пазбаўленне волі.
Шмат хто мяркуе, што 78-гадовай жанчыне з улікам узросту прызначаць пакаранне ў выглядзе так званай «хатняй хіміі». Але вось тут і хаваецца той самы небяспечны юрыдычны нюанс. Згодна з законам, чалавек, якому прызначылі абмежаванне волі з накіраваннем у спецкамендатуру або па месцы жыхарства, павінен працаўладкавацца. Але ж Ніна Багінская пенсіянерка са стажам і мае права не працаваць. Заўважым, заслужанае права. Але ў такім выпадку, да яе не можа быць ужытае такое пакаранне. Гэта значыць менавіта непрацуючыя пенсіянеры ў выпадку абвінавачання па такім артыкуле, становяцца самай уразлівай групай. Калі нават суд і пакарае чалавека абмежаваннем волі, то выканаўцы павінны прасачыць, каб гэты чалавек знайшоў сабе працу і працаваў. Інакш абмежаванне заменяць на рэальнае пазбаўленне свабоды.
Што на практыцы можа азначаць для Ніны Багінскай пазбаўленне волі? Пенсіянерка мае шэраг сур'ёзных цяжкіх хранічных захворванняў. Многія ведаюць пра гэта, бо былі сведкамі прыступаў. Сёння да ўсіх ранейшых дыягназаў дадаўся артроз каленных суставаў. Ніна пачала праходзіць курс лячэння нават не ў сваёй у паліклініцы па месцы жыхарства, таму што ў нас у сталіцы далёка не ў кожнай паліклініцы ёсць такое абсталяванне. Багінскай сярод іншага неабходна магнітатэрапія, а гэта прыбор не танны і ён даволі вялікіх памераў. Лекары папярэдзілі, што працэдуры неабходна перыядычна паўтараць, каб можна было хаця б па начах не прачынацца ад нясцерпнага болю. Але хто гэта будзе рабіць у турэмных умовах? І што такое трываць пякельны боль з хворым сэрцам? І якое лячэнне можа атрымаць у турэмных умовах пажылы цяжка хворы чалавек? Мы ўсе ведаем адказы на гэтыя пытанні. Але няма адказу на галоўнае: як выратаваць чалавека, які лічыць, што сёння ягонае месца ў сваёй краіне са сваім народам? І з’яжджаць спадарыня Ніна не збіраецца. Цяпер апошняе слова ў гэтай справе за судом.
Любоў Лунёва belsat.eu