Еўразійскі банк развіцця спрагназаваў рост заробкаў у Беларусі з увагі на дэфіцыт працоўных рук. Тым часам колькасць вакансіяў расце і ўжо наблізілася да 200 тысячаў. «Белсат» паглядзеў, каго шукаюць і якімі грашыма завабліваюць.
Лік занятых у беларускай эканоміцы расце пяць месяцаў запар, адначасова не спыняецца рост колькасці вакансіяў: на 1 снежня 2023 года на сайце дзяржаўнай службы занятасці было больш за 137 тысячаў абвестак, улетку летась – каля 164 тысячаў, у пачатку гэтага года – 184 тысячы, а цяпер, на 1 красавіка, – 195 278 вакансіяў.
Еўразійскі банк развіцця адзначае, што «высокі попыт на працоўную сілу падтрымоўвае павышэнне аплаты працы». У лютым рэальныя заробкі (то бок з улікам росту цэнаў) павялічыліся ў Беларусі на 11,1 % год да года, асобна ў бюджэтнікаў – на 12 %.
«Чакаем далейшага росту заробкаў, чаму будзе спрыяць высокая канкурэнцыя за кадры і запланаванае ў бюджэце павышэнне заробкаў у дзяржаўным сектары», – спрагназаваў ЕАБР.
Работнікаў не стае з дзвюх прычынаў. Па-першае, кепска з дэмаграфіяй: беларусаў памірае больш, як нараджаецца. Надоечы Белстат паведаміў, што за мінулы год насельніцтва краіны паменела на 46 698 чалавек – прыкладна столькі жыве ў Слоніме.
Па-другое, дэфіцыту кадраў спрыяе міграцыя. Беларусы едуць па большыя грошы за мяжу, а шмат хто пакідае радзіму вымушана, бегучы ад рэпрэсіяў.
Паводле Белстату, сярэдні налічаны заробак у лютым – Br 2428,1, або $ 775 паводле курсу Нацыянальнага банку на 1 красавіка, а, напрыклад, у Маскве сярэдні за мінулы год заробак склаў у пераліку Br 5909 (або $ 1886).
Больш паказальная лічба – медыянны прыбытак: палова працаўнікоў атрымлівае менш за гэты паказнік, другая палова – больш. У леташнім лістападзе, як паведамляў Белстат, медыянны заробак склаў Br 1792,2.
Дзяржаўная служба занятасці цяпер прапануе 36 712 вакансіяў (19 % ад агульнай колькасці) з заробкам, вышэйшым за медыянны. А вось прыбытак, вышэйшы за сярэдні, прапануецца толькі ў 9985 абвестках (5 % ад агульнай колькасці).
«Медыянны заробак» у вакансіях – Br 1200: у палове абвестак кандыдатам абяцаюць менш за гэтую суму, у другой палове – больш.
Мінімальны заробак, што прапануюць працадаўцы, – Br 626, хаця з 1 студзеня плаціць работнікам менш за Br 726 забаронена, гэта прапісана ў пастанове ўраду. Br 626 мінімальнага заробку ў краіне было летась, і кадравікі, падобна, проста не абнавілі абвестак.
Найменш грошай можна атрымаць за працу, напрыклад, прыбіральнікам, качагарам ці кантралёрам якасці на фабрыцы «8 Сакавіка».
Найвялікшы заробак цяпер прапануе менская кампанія «Арэс груп», якая шукае дырэктара ў справах інвестыцыяў. Абяцаюць ад Br 14 000 да Br 17 500.
Ад Br 11 000 да Br 14 700 абяцае прадстаўніцтва ў Беларусі швейцарскай фармацэўтычнай кампаніі «Delta Medical» менеджару ў справе развіцця.
Топ-3 замыкае фінансава-інвестыцыйная кампанія «Інха», якая прапануе ад Br 10 000 да Br 19 000 праграмісту.
Сцяпан Кубік belsat.eu
