Нават калі верыць афіцыйнай статыстыцы, з дэмаграфіяй у Беларусі справы ідуць кепска. А ёсць сур’ёзныя падставы лічыць, што напраўду сітуацыя горшая.
Нацыянальны статыстычны камітэт апублікаваў свежыя звесткі пра насельніцтва Беларусі. Паводле Белстату, на 1 студзеня 2025 года складала 9 109 280 чалавек – на 46 698 менш за пачатак мінулага года. Гэтыя страты параўнальныя з насельніцтвам Слоніма.
Цягам 2024 года насельніцтва змяншалася ва ўсіх вобласцях Беларусі, найхутчэй – у Гомельскай, якая страціла, паводле Белстату, 10,6 тысячы чалавек. Насельніцтва вырасла толькі ў Менску і абласных цэнтрах, але не на шмат: у сталіцы – усяго на 3868 чалавек.
Яшчэ ў 2000 годзе насельніцтва Беларусі складала 10 млн чалавек. Але памяншацца яно можа вышэйшымі тэмпамі, чым паведамляе Белстат. Паводле амерыканскіх прагнозаў, да канца стагоддзя ў Беларусі застанецца 6,2 млн чалавек.
Паводле дакументу Камітэту дзяржаўнага кантролю, які здабыў «BELPOL», у лістападзе 2024 года насельніцтва складала ўжо толькі 8,78 млн чалавек. Імаверна, у афіцыйнай статыстыцы не ўлічваецца эміграцыя – а эмігравалі з 2020 года, паводле розных ацэнак, ад 350 тысяч да 500–600 тысяч чалавек. Таксама можа скажацца смяротнасць ад ковіду: афіцыйна паведамлялі пра 4662 памерлых, напраўду ж за час пандэміі было больш за 90 тысяч надмерных смерцяў – страты параўнальныя са стратамі Расеі ад трох гадоў вайны супраць Украіны.
У Беларусі ёсць праблемы і з нізкай нараджальнасцю, і з высокай колькасцю разводаў. Акрамя таго, шмат каму бракуе ўласнага жытла: паводле Белстату, 558,4 тысячы сем’яў лічацца такімі, якія маюць патрэбу ў паляпшэнні жыллёвых умоваў. За мінулы год жытло атрымалі толькі 20,7 тысяч такіх сем’яў. Дзяржава спадзяецца на дэўрбанізацыю.
Алесь Наваборскі belsat.eu
