Імклівы рост колькасці вакансіяў на сайце дзяржаўнай службы занятасці апошнім часам прыпыніўся ў раёне 164 тысяч актуальных абвестак. Працадаўцы шукаюць 3 % ад рабочай сілы краіны. Толькі яны ў сярэднім не гатовыя плаціць сярэдні заробак.
Абвесткі аб пошуку працаўнікоў у Беларусі найчасцей даюць на сайце дзяржаўнай Службы занятасці Gsz.gov.by. Пакуль публікацыя абвестак там добраахвотная, але са студзеня ўлады разглядаюць законапраект, каб зрабіць абавязковай публікацыю вакансіяў спачатку там, а потым у іншых крыніцах.
І да нядаўняга часу колькасць вакансіяў у Службе занятасці імкліва расла: у ліпені было 164 з лішнім тысячы, у чэрвені 159 тысяч, у траўні 152 тысячы, у лютым 137 тысяч – прыблізна столькі ж, колькі на канец снежня-2023. Год таму банк вакансіяў налічваў 123 тысячы абвестак.
Падобна, рост прыпыніўся: на момант публікацыі на сайце Службы занятасці 163 171 абвестка, з іх дададзеныя за апошні месяц 71 857, за апошні тыдзень – 14 677, за дзень – 437.
Гэтыя 163 тысячы – 3,28 % ад усёй рабочай сілы Беларусі, якая, паводле Белстату, налічвае 4,979 млн чалавек. І гэта блізка да колькасці беспрацоўных з дзяржаўнай статыстыкі.
Выходзіць, праца ёсць, вольныя працоўныя рукі ёсць – чаму ж колькасць вакансіяў не змяншаецца? Магчыма, справа ў патрабаваннях да шукальнікаў працы і заробках, якія пры тых патрабаваннях прапануюць.
Колькі гатовыя плаціць
Звярніце ўвагу: з бальшыні абвестак невідавочна, ці пазначаны заробак «бруднымі» (да вынятку падаткаў і збораў), ці «чыстымі» (па вынятку, то бок колькі «на рукі»). Сярэдні і медыянны заробкі, якія публікуе Белстат, гэта заробкі «бруднымі», ад якіх трэба адымаць 14 %, каб атрымаць заробкі «чыстымі».
У базе вакансіяў знайшлося амаль 115 тысяч абвестак пра пастаянную працу з пазначаным заробкам, актуальных у гэтым месяцы.
Мінімальны заробак за поўную стаўку адпавядае мінімальнаму заробку па краіне: 626 рублёў. Але можна зарабляць і менш: напрыклад, у Жыткавічах у «Беларусбанк» шукаюць рабочага на комплексны рамонт будынкаў за 41–45 рублёў на месяц на 0,1 стаўкі.
Максімум – ад 10 да 15 тысячаў рублёў на месяц менеджару па вонкаваэканамічных сувязях у кампанію «МарсКарс», якая прадае ў Беларусі кітайскія аўто. Важнае патрабаванне: трэба добра валодаць кітайскай мовай.
Сярэдні заробак у Беларусі, калі верыць Белстату, складаў у чэрвені 2270 рублёў (больш новых звестак няма).
Ды ў Службе занятасці не так шмат абвестак з такім заробкам: тых, дзе заробкі пачынаюцца ад 2270 рублёў на месяц – толькі 3054 вакансіяў або 2,66 % ад усіх абвестак.
Але сярэдні заробак – не надта добры паказнік. Калі дырэктар атрымлівае 5 тысяч, а чацвёра ягоных падначаленых па 1 тысячы, то сярэдні заробак у кампаніі – 2 тысячы. Лепшы паказнік – медыянны заробак, то бок заробак сярэдняга чалавека ў спісе заробкаў ад найменшага да найбольшага.
Медыянны заробак у Беларусі, паводле Белсатату, у траўні складаў 1688,3 рубля (больш новых звестак няма). Гэта 536 долараў – крыху больш за «сакральныя па пяцьсот». Але калі адняць падаткі і зборы, выходзіць 461 долар.
Але ў абвестках Службы занятасці з пазначаным заробкам медыянны па вакансіях – 925 рублёў на месяц. Не «па пяцьсот», а нават не «па трыста».
За такія грошы – 925 рублёў на месяц – шукаюць, напрыклад, пекара ў Пружанах, фрэзероўшчыка ў Менску, настаўніка ў вёсцы Малыя Зводы пад Берасцем, прадаўца ў краме ў Салігорску, намесніка дырэктара футбольнага клубу «Маладзечна-2018», аператара ЭВМ (на мове айцішнікаў – энікейшчыка) ў «КобрынБакалею» і ў менскі НДІ пажарнай бяспекі, вядучых аграномаў у Шчучыне і Зэльве, кіроўцу ў школу аграгарадку Жамчужным пад Баранавічамі, сядзелку ў Клімавіцкі цэнтр сацыяльнага абслугоўвання, начальніка ўчастка ЖКГ у Зэльве, інжынера арганізацыі перавозак на МТЗ, тэхніка на «Менск-арэну»…
І за такія грошы можна папрацаваць і праграмістам: напрыклад, у менскім БДУІР і на менскім станкабудаўнічым заводзе, у віцебскім раённым цэнтры забеспячэння дзейнасці бюджэтных арганізацыяў, у воранаўскім аблспажыве, у жлобінскай «Белпошце», у мемарыяле «Берасцейская крэпасць».
Чытайце таксама: «Месячнага заробку беларуса з рэгіёну не хопіць» – палічылі, колькі сёлета бацькам каштуюць зборы ў школу
Алесь Наваборскі, «Белсат»
