Прэзідэнт ЗША Доналд Трамп у панядзелак 19 траўня двойчы гутарыў з Зяленскім – незадоўга да тэлефоннага званку Пуціну і пасля яго.
Да другой размовы далучыліся таксама лідары еўрапейскіх краінаў.
,,«Я папрасіў яго (Трампа – рэд.) не прымаць ніякіх рашэнняў пра Украіну без Украіны», – распавёў Зяленскі.
Падчас размовы да тэлефоннага званку Трампа Пуціну гаворка паміж прэзідэнтамі ЗША і Украіны ішла пра прыпыненне агню і ўвядзенне ЗША санкцыяў супраць Расеі ў выпадку парушэння пагаднення аб спыненні баявых дзеянняў.
Падчас другога званку, на якім прысутнічалі прадстаўнікі дзяржаваў Еўразвязу, абмяркоўваліся перамовы паміж Украінай і Расеяй. Зяленскі адзначае, што для Трампа важныя менавіта прамыя перамовы паміж дзвюма краінамі. Украіна тым часам разглядае магчымасць сустрэчы дэлегацыяў ЗША, Украіны, Расеі і прадстаўнікоў еўрапейскіх дзяржаваў. Паводле прэзідэнта Украіны, такая сустрэча можа адбыцца ў Турцыі, Ватыкане ці Швейцарыі.
Зяленскі па выніках дзвюх размоваў заявіў, што Украіна не прыме расейскія ўльтыматумы, а таксама не будзе выводзіць войскі са сваіх тэрыторыяў:
,,«Выводзіць нашыя войскі з нашых тэрыторыяў ніхто не будзе. Гэта мой канстытуцыйны абавязак, гэта абавязак нашых вайскоўцаў – абараняць суверэнітэт і тэрытарыяльную цэласнасць краіны. Украіна не паддасца ўльтыматумам РФ. Ва Украіны ёсць статус, ён у Канстытуцыі краіны – там усё напісана. <…> Мы чакаем прапановы, якія прадставіць Расея», – сказаў Зяленскі.
Украіна працягвае настойваць на поўным і безумоўным спыненні агню.
«Такое спыненне агню павінна быць дастаткова працяглым і ўключаць магчымасць працягу. Нашая прапанова – 30 дзён. Мы нават гатовыя да сустрэчы на ўзроўні лідараў для рашэння ключавых пытанняў», – напісаў украінскі прэзідэнт у Х.
19 траўня Трамп больш за дзве гадзіны размаўляў па тэлефоне з Уладзімірам Пуціным. Кіраўнік РФ назваў размову «адкрытай, змястоўнай і вельмі карыснай». Ён падзякаваў Трампу за ўдзел ЗША ў аднаўленні перамоваў паміж Расеяй і Украінай і зазначыў, што спыненне баявых дзеянняў магчымае пры ўмове дасягнення пэўных дамоўленасцяў. Адначасова Пуцін нагадаў, што пазіцыя Расеі ў тым, каб была зліквідаваная першапрычына канфлікту.
Трамп пасля размовы напісаў у сацсетцы TruthSocial, што «тон і дух размовы былі выдатнымі», і што Расея і Украіна неадкладна распачнуць перамовы аб спыненні агню і завяршэнні вайны. Умовы дзеля гэтага абодва бакі будуць узгадняць паміж сабой. Таксама Трамп паведаміў, што праінфармуе еўрапейскіх лідараў аб неадкладным пачатку перамоваў паміж Украінай і Расеяй.
«Перамовы паміж Расеяй і Украінай распачнуцца неадкладна. Я праінфармаваў аб гэтым прэзідэнта Украіны Уладзіміра Зяленскага, Урсулу фон дэр Ляен – старшыню Еўракамісіі <…> Ватыкан, прадстаўлены Папам Рымскім, заявіў, што вельмі зацікаўлены ў правядзенні перамоваў на сваёй тэрыторыі. Няхай распачнецца працэс!», – напісаў прэзідэнт ЗША.
16 траўня ў Стамбуле адбыліся першыя з 2022 года прамыя перамовы расейскай і ўкраінскай дэлегацыяў. Бакі дамовіліся аб абмене палоннымі па формуле «тысяча на тысячу» і разгледзелі імаверную сустрэчу Пуціна і Зяленскага.
Марыя Міхалевіч belsat.eu
