У Авальным кабінеце Белага дому ў пятніцу, 30 траўня, адбылася прэс-канферэнцыя з нагоды сыходу Ілана Маска з пасады кіраўніка Дэпартаменту эфектыўнасці дзяржаўнага кіравання (DOGE). Доналд Трамп на развітанне ўручыў мультымільярдэру залаты ключык. Медыі звярнулі ўвагу, што Маск прыйшоў з сіняком пад вокам і паводзіўся дзіўна.
Паводле афіцыйнай версіі, Ілан Маск пакінуў пасаду кіраўніка DOGE ў сувязі з заканчэннем тэрміну кантракту і таму, што хоча сканцэнтравацца на сваім бізнесе – кампаніях «Tesla» і «SpaceX», а таксама на платформе Х (былы Twitter). Продажы «Tesla» ўпалі за першыя тры месяцы гэтага года на 13 %, што было найбуйнейшым падзеннем продажаў за ўсю гісторыю кампаніі. У красавіку Маск заявіў інвестарам, што ягоны час у DOGE «значна скароціцца» і ён «будзе прысвячаць "Tesla" значна больш свайго часу».
Аднак бізнесовец не разрывае сувязяў з Белым домам – ён працягне кансультаваць адміністрацыю прэзідэнта ЗША.
,,«Ілан насамрэч не сыходзіць. Ён будзе сыходзіць і вяртацца», – сказаў Трамп, маючы на ўвазе, што Маск будзе кансультаваць яго пры патрэбе.
Трамп на развітанне пахваліў Маска за «каласальныя змяненні ў старых метадах вядзення бізнесу ў Вашынгтоне», а падарунак – залаты ключык у футляры з выяваю Белага дому – суправадзіў словамі, што такі сувенір «атрымліваюць толькі асаблівыя людзі».
На відэазапісах з прэс-канферэнцыі добра бачна, што ў Маска сіняк каля правага вока. Прадпрымальнік патлумачыў, што яго ўдарыў пяцігадовы сын – Маск сам нібыта папрасіў яго пра гэта.
Таксама звяртаюць на сябе ўвагу дзіўныя паводзіны Маска падчас канферэнцыі – ён закідваў галаву і круціў ёй у розныя бакі. Летась выданне «The Wall Street Journal» пісала, што прадпрымальнік злоўжывае пэўнымі лекамі. Сам Маск казаў, што прымае кетамін на прызначэнне лекара. А надоечы выданне «The New York Times» напісала, што падчас выбарчай кампаніі Трампа Маск ужываў наркотыкі ў істотна большай колькасці, чым раней. Паводле відавочцаў, паплечнік Трампа заўсёды насіў з сабой скрынку з таблеткамі.
Маск напісаў у Х пра свой сыход праз дзень пасля таго, як заявіў, што «расчараваны» законапраектам Доналда Трампа аб бюджэце. Гэты праект бюджэту быў адным з галоўных складнікаў палітычнай стратэгіі Трампа, што сведчыць пра адрыў Маска ад прэзідэнта ЗША, якому ён дапамог пераабрацца ў 2024 годзе.
«Вялікі, прыгожы» законапраект Трампа ўключае падатковыя льготы на некалькі трыльёнаў долараў і павелічэнне выдаткаў на абарону. На думку Ілана Маска, гэта падрывае працу, якую ён зрабіў для Трампа дзеля скарачэння выдаткаў. Маск спыніў фінансаванне замежнай дапамогі ЗША, а таксама скараціў каля 260 тыс. з 2,3 млн федэральных цывільных работнікаў. Пасля незадавальнення з боку грамадзянаў Маск заявіў, што «DOGE проста становіцца хлопчыкам для біцця за ўсё».
Маск, які меў прыватныя канфлікты з некаторымі чальцамі кабінету міністраў Трампа, спачатку абяцаў у рамках DOGE скараціць федэральны бюджэт «прынамсі на 2 трлн долараў», потым зменшыў гэтую мэту ўдвая, а ўрэшце – да 150 млрд долараў.
Марыя Міхалевіч belsat.eu
