Белстат паведаміў, што ў лютым у эканоміцы былі занятыя 4 млн 141 тысяча асобаў, і гэты паказнік расце пяты месяц. «Белсат» спытаў экспертку Настассю Лузгіну, адкуль узяліся работнікі.
Рост ліку занятых у эканоміцы пачаўся з кастрычніку, тады іх было амаль 4 млн 118 тысячаў. Цяпер, у лютым, – ужо 4 млн 141 тысяча, падлічыў Белстат. Аднак, калі пакінуць за дужкамі гэтую прывабную дынаміку апошніх месяцаў, агулам сітуацыя з работнікамі кепская: у параўнанні з 2019 годам занятых у эканоміцы ў 2024-м паменела на 212 тысячаў.
Адна з галоўных прычынаў скарачэння працаўнікоў у Беларусі – эміграцыя. Першая хваля выезду за мяжу адбылася пасля пратэстаў 2020 года, другая – пасля пачатку поўнамаштабнай вайны ва Украіне.
Рэпрэсіі ў Беларусі не сцішыліся, вайна працягваецца, то бок перадумоваў для масавага вяртання людзей на радзіму бракуе. Адкуль тады ўзяліся работнікі?
«Гэта могуць быць сезонныя чыннікі», – кажа «Белсату» эканамістка даследчага цэнтру BEROC Настасся Лузгіна, звяртаючы ўвагу на тое, што ў пачатку 2024 года лік занятых у эканоміцы таксама павялічваўся, а потым зноў пачаў падаць.
Акрамя таго, цяперашні рост паказніку можна растлумачыць паляваннем уладаў на «дармаедаў»:
,,«Мы ведаем, што рэйды ладзяць, каб максімальна выявіць "дармаедаў" і прыцягнуць іх хоць на нейкую працу. У любой краіне заўсёды будзе пэўны адсотак людзей, якія не працуюць з розных прычынаў, але ў Беларусі за гэтым пільна сочаць, бо людзей не стае. Эканоміка летась актыўна расла, патрабаваліся працоўныя рукі, адпаведна, намагаліся "дармаедаў" зацягваць у эканоміку».
Яшчэ адной крыніцаю працоўных рук маглі стацца пенсіянеры, у якіх перасталі забіраць грошы ў выпадку працаўладкавання:
«Надоечы скасавалі абмежаванне ў выплатах пенсіяў пенсіянерам, якія працуюць. Гэта таксама магло ў пэўнай ступені адбіцца на тым, што больш пенсіянераў пайшлі працаваць».
Аднак такое «адшукванне ўнутраных рэзерваў» не бясконцае, а праблема эміграцыі беларусаў застаецца надзвычай актуальнаю, пра гэта сведчаць, напрыклад, планы ўладаў пагоршыць умовы размеркавання выпускнікоў і абмежаваць выезд моладзі за мяжу. Таму можна прагназаваць, што лік занятых у эканоміцы найбліжэйшым часам ізноў пачне скарачацца.
Сцяпан Кубік belsat.eu
