Ужо ў чэрвені гэтага года мусяць распачацца рамонтныя працы ў касцёле Святых Сымона і Алены ў Менску, вядомым як Чырвоны касцёл, паведаміла начальніца ўпраўлення культуры сталічнага гарвыканкаму Кацярына Лучына.
Паводле чыноўніцы, Чырвоны касцёл – аб’ект гістарычна-культурнай спадчыны, таму надаецца «належная ўвага яго абнаўленню і рэканструкцыі».
,,«У чэрвені распачнуцца рамонтныя працы. Думаю, да наступнага года яны будуць скончаныя», – сказала Лучына.
Апошняя служба ў Чырвоным касцёле адбылася 25 верасня 2022 года. Потым уначы ў святыні адбыўся пажар, а ўжо 26 верасня касцёл апячаталі. Ён зачынены дасюль, бо адміністрацыі Маскоўскага раёну Менску забараніла эксплуатаваць будынак. Касцёл адключылі ад усіх камунікацыяў. У 2024-м быў звольнены шматгадовы пробашч святыні ксёндз Уладзіслаў Завальнюк.
Менскі гарвыканкам у гэтым сакавіку запатрабаваў ад парафіі вынесці з касцёлу ўсю рухомую маёмасць, каб «Менская спадчына» магла распачаць рамонтныя працы.
Улады забаранілі вернікам маліцца не толькі ў касцёле, але і побач з ім.
Для рамонту святыні не правялі тэндару на пошук падрадчыка, а ў Інвестыцыйнай праграме Менску няма для гэтага фінансавання. Вернікі баяцца, што пасля рамонту парафію могуць выселіць або выставіць ёй дадатковыя фінансавыя патрабаванні – на сёння «Менская спадчына» налічыла парафіі доўг памерам 148 тысячаў рублёў.
Кацярына Лучына згадала таксама яшчэ два гістарычна-культурныя аб’екты Менску, чый лёс будзе неўзабаве вызначаны – Пішчалаўскі замак і забудова ў праездзе Чыжэўскіх.
У справе Пішчалаўскім замку цяпер вядуцца праектныя працы. Пасля яго рэканструкцыі ў комплексе будуць размяшчацца кавярні і рэстараны беларускай кухні, вялікая пляцоўка са сцэнаю, дзе плануюць ладзіць культурніцкія імпрэзы, гістарычныя рэканструкцыі.
У праездзе Чыжэўскіх недалёка ад Лошыцкага парку ўжо на Дзень гораду будуць адкрытыя адноўленыя будынкі – ЗАГС, гатэль, дзіцячая і звычайная кавярні.
Марыя Міхалевіч belsat.eu
