«Белсат» аналізуе вынікі чарговага тыдня поўнамаштабнай вайны, распачатай Расеяй ва Украіне. Пра становішча на фронце станам на 17 лютага чытайце ў нашым матэрыяле.
Цягам апошняга тыдня працягваліся баявыя дзеянні рознай інтэнсіўнасці на тэрыторыі Суджанскага раёну Курскай вобласці РФ, у якіх адноснай ініцыятывай валодалі Узброеныя сілы РФ. Пры гэтым іх асноўныя намаганні былі засяроджаныя на заходнім фланзе ў ваколіцах сяла Свердлікава. Паводле прарасейскіх крыніцаў, сам населены пункт, які знаходзіцца недалёка ад мяжы з Украінай, амаль цалкам перайшоў пад кантроль войскаў РФ.
Імаверна, далей адсюль расейцы будуць рухацца на паўднёвы ўсход у кірунку Суджы, якую са Свердлікавым звязвае прамы ўчастак трасы.
Акрамя гэтага атакі расейцаў зафіксаваныя ў ваколіцах населеных пунктаў Малая Локня, Паграбкі і Чаркаскае Папярэчнае (на заходнім і паўночным флангах лініі фронту на Куршчыне), аднак зменаў лініі сутыкнення не адбылося.
У гэты ж час актыўнасць Збройных сілаў Украіны фіксавалася на паўднёвым усходзе ад Суджы на ўчастку паміж сёламі Махноўка і Фанасееўка, дзе раней ЗСУ правялі шэраг удалых контратак.
На паўночным усходзе Харкаўскай вобласці расейцы паступова прасоўваюцца на правым беразе ракі Аскіл, дзе раней ім удалося стварыць некалькі невялікіх плацдараў. Так, паводле аналітыкаў праекту Deepstate, ад сяла Навамлынск УС РФ прасунуліся да паўднёвых ускрайкаў суседняй Фыголаўкі (Фиголівка), а ніжэй па фронце расейцы занялі яшчэ адзін раён населенага пункту Дварычна. Таксама фіксуецца рух у ваколіцах самой Дварычнай і сяла Западнае.
Адзначаецца, што ў асноўным прасоўванні УС РФ адбываюцца за кошт істотнай перавагі ў жывой сіле і FPV-дронах: з дапамогай апошніх цалкам знішчаюцца пазіцыі ўкраінцаў, пасля чаго іх абарона робіцца немагчымай
Верагодна, ціск расейцаў на гэтым участку фронту звязаны са спробай выйсці да гораду Купянск з поўначы (раённы цэнтр). Між тым, не трэба выключаць імавернасць таго, што расейцы намагаюцца стварыць так званую буферную зону ўздоўж дзяржаўнай мяжы. Акрамя гэтага, занятыя тэрыторыі на Харкаўшчыне паляпшаюць пазіцыі кіраўніцтва РФ пры правядзенні будучых мірных перамоваў.
На поўначы Данецкай вобласці Узброеныя сілы РФ намагаюцца ліквідаваць плацдарм праціўніка на левым беразе ракі Жарабец, атакуючы ў Ямпалаўцы. Цяпер баі ідуць у цэнтральнай частцы сяла, але ў выпадку далейшых поспехаў расейцы могуць працягнуць рух на поўдзень у бок Торскага і Зарэчнага, што ў перспектыве адкрые дарогу да гораду Ліман. Акрамя гэтага на паўднёвым усходзе ад Ліману праходзіць траса на Сіверск, пераразанне якой істотна пагоршыць становішча Сілаў абароны Украіны на выступе ў ваколіцах гораду.
На захадзе Данбасу варта звярнуць увагу на сітуацыю ў ваколіцах Пакроўску. Тут ЗСУ правялі паспяховую контратаку на паўднёвым захадзе ад гораду, у выніку якой ўдалося зайсці ў сяло Пішчанае, а таксама прасунуцца далей на глыбіню з паўкіламетра.
Адначасова з гэтым ЗСУ ціснуць у ваколіцах Котліна, што ўказвае на намер ліквідаваць выступ праціўніка паміж гэтымі населенымі пунктамі.
,,Такім чынам, можна адзначаць, што ўкраінскім вайскоўцам удалося стабілізаваць сітуацыю ў ваколіцах Пакроўску, не дапусціўшы прарыву праціўніка з поўдня і паўднёвага захаду.
Тым часам на суседнім навапаўлаўскім кірунку (ніжэй па фронце) ініцыятыва па-ранейшаму застаецца за расейцамі, якія атакуюць на захад, імкнучыся выйсці да мяжы з Днепрапятроўскай вобласцю.
Акрамя гэтага войскі РФ намагаюцца ліквідаваць выступ па лініі фронту з захаду ад раней занятага гораду Курахава. Тут 15 лютага расейцы правялі маштабныя штурмавыя дзеянні ў кірунку населеных пунктаў Канстанцінопаль і Улаклы. Паводле праўкраінскіх крыніцаў, праціўнік задзейнічаў да 37 адзінак тэхнікі, з дапамогай якой ажыццяўляўся падвоз пяхоты да абодвух сёлаў. Адзначаецца, што большая частка тэхнікі была знішчаная, аднак войскам РФ усё ж удалося замацавацца ва ўсходняй частцы Улаклаў, што істотна пагаршае становішча Сілаў абароны на кірунку.
Імаверна, далей расейцы будуць намагацца злучыцца са сваёй групоўкай у ваколіцах Андрэеўкі, што пагражае атачэннем ЗСУ.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.
Наталля Кулыгіна belsat.eu
