Польскі касцёл аказвае дапамогу каталіцкаму касцёлу ў Беларусі, які зараз знаходзіцца пад пераследам. Пра гэта казаў дырэктар польскай секцыі Папскай асацыяцыі «Дапамога Касцёлу ў патрэбе» ксёндз Ян Вітольд Жэлязны падчас прэс-канферэнцыі, прысвечанай Дню салідарнасці з пераследаваным Касцёлам. Гэтая дата адзначаецца ў Польшчы ў 16 раз і прыпадае на 10 лістапада.
Дзень салідарнасці з пераследаваным Касцёлам прысвечаны ў гэтым годзе святарам і вернікам Святой зямлі – з Ізраілю, Лівану, Сірыі. 10 лістапада пройдзе ў касцёлах пад дэвізам «S.O.S. для Святой зямлі».
«Мусім дзейнічаць у тых варунках, якія маем»
«Дзень салідарнасці – гэта дзень, у які мы хочам запрасіць людзей да супольнай малітвы за тых, хто застаўся на Святой зямлі, хто яшчэ пакутуе ад вайны і рознага роду пераследу, у тым ліку рэлігійнага», – падкрэсліў у сваёй прамове прэс-сакратар Канферэнцыі біскупаў Польшчы ксёндз Лешэк Гэнсяк.
У прэс-канферэнцыі бралі таксама ўдзел дырэктар польскай секцыі Папскай асацыяцыі «Дапамога Касцёлу ў патрэбе» ксёндз Ян Вітольд Жэлязны і старшы абат абацтва Дорміцыён на Сіёне ў Іерусаліме Бернард Марыя Альтэр.
Напрыканцы сустрэчы «Белсат» спытаўся пра стаўленне польскага Касцёлу да рэпрэсіяў, якія чыняцца лукашэнкаўскім рэжымам супраць святароў і вернікаў ў Беларусі.
«Сёння перадусім гаворым пра касцёл Ізраілю, пра касцёл Святой зямлі. Гэта нашая кропка адліку. У той жа час да кожнага касцёлу, які пераследуецца, стараемся ставіцца такім жа самым чынам. Бо ўсе яны – нашыя браты, усіх трэба падтрымліваць. Зразумела, што, калі хрысціяне церпяць, за іх варта маліцца, а калі патрабуюць матэрыяльнага падтрымання, то падтрымліваць матэрыяльна», – адказаў прэс-сакратар Канферэцыі біскупаў Польшчы Лешэк Гэнсяк.
У сваю чаргу, дырэктар польскай секцыі Папскай асацыяцыі «Дапамога Касцёлу ў патрэбе» ксёндз Ян Вітольд Жэлязны сцвердзіў, што ведае пра сітуацыю ў Беларусі, у прыватнасці, пра тое што дзеецца, прыкладам, ў Віцебскай дыяцэзіі.
З ягоных словаў, палякі аказваюць вялікую матэрыяльную дапамогу каталіцкім парафіям у Беларусі.
,,«Дапамога сапраўды ўдзяляецца. Нават тады, калі сітуацыя ў Беларусі робіць немагчымымі многія нашыя дзеянні. Мусім дзейнічаць у тых варунках, якія маем. Але усякае магчымае падтрыманне ў існай сітуацыі ёсць», – запэўніў Лешэк Гэнсяк.
Каталіцкі касцёл Беларусі – не забыты, дадаў прэс-сакратар Канферэцыі біскупаў Польшчы.
Стаўленне Ватыкану да рэпрэсіяў ў дачыненні да беларускіх святароў і вернікаў Лешэк Гэнсяк ніяк не пракаментаваў.
Пяць святароў – палітвязні
Паводле дадзеных працоўнай групы «Хрысціянская візія», з 2020 года пад палітычны пераслед беларускіх уладаў падпаў 31 каталіцкі ксёндз, 29 пратэстанцкіх святароў, 21 – праваслаўны, 5 – грэка-каталіцкіх святароў.
Нагадаем, што праваабарончая супольнасць Беларусі прызнала пяцярых з іх палітычнымі зняволенымі. Гэта каталіцкі ксёндз з Валожына Генрых Акалатовіч, якога амаль год утрымліваюць у СІЗА КДБ, ксёндз-пробашч з Шуміліна Анджэй Юхневіч, праваслаўны святар Сяргей Рэзановіч, асуджаны на 16 гадоў калоніі, прапаведнік царквы ЕХБ «Дабравесце» Мікалай Хіла і выкладчык катэхізіса ў Менскім Архікафедральным саборы Уладзіслаў Беладзед (вырак – тры гады калоніі).
У кастрычніку стала вядома, што моцны ціск чыніцца на святара-палітвязня Анджэя Юхневіча, які з 8 траўня ўтрымліваецца ў віцебскім СІЗА-2 і якога там катавалі. Яму пагражаюць завядзеннем крымінальнай справы за злачынства супраць палавой недатыкальнасці няпоўнагадовых. Як зазначае «Хрысціянская візія», з падобнага кшталту пагрозамі сутыкаліся і іншыя служыцелі каталіцкага касцёлу ў Беларусі, аднак выпадкі такіх злачынстваў так і не былі даказаныя.
Ксёндз Юхневіч быў затрыманы ў траўні 2024 года разам з іншым святаром – Паўлам Лемехам, які пасля 14 содняў адміністрацыйнага арышту выйшаў на волю і пакінуў краіну.
Валожынскаму пробашчу і палітвязню Генрыху Акалатовічу 64 гады. Ён хворы на анкалогію і нядаўна перанёс інфаркт. Як паведамляе праваабарончы цэнтр «Вясна», у верасні стала вядома, што следства ў справе ксяндза скончанае. Святара абвінавачваюць у «здрадзе дзяржавы». Але суд пакуль не адбыўся.
«Белсат» паведамляў раней пра сустрэчу апостальскага нунцыя архіепіскапа Антэ Ёзыча, які скончыў місію ў Беларусі, з Аляксандрам Лукашэнкам. Падчас сустрэчы былі нібыта «закранутыя і пытанні, што хвалююць каталіцкую супольнасць у Беларусі, Лукашэнка паабяцаў іх разгледзець і паспрыяць хутчэйшаму развязанню. Але зрухаў пакуль што няма.
Судзяць за цытаты з Бібліі
Не спыняецца ў Беларусі і рэпрэсіі супраць вернікаў розных канфесіяў. Толькі ў кастрычніку «Хрысціянская візія» зафіксавала сем выпадкаў, калі супраць звычайных каталікоў, праваслаўных ці пратэстантаў заводзіліся крымінальныя і адміністрацыйныя справы.
У лістападзе стала вядома, што «хатнюю хімію» прысудзілі верніцы з першай групай інваліднасці Валянціне Крыштопенцы, якую яшчэ ў 2020 годзе судзілі за цытату з Бібліі: «Калі пануе бязбожнік, народ стогне».
Зачыненая і каталіцкая святыня ў цэнтры Менску – касцёл Святых Сымона і Алены. Вернікі парафіі звярнуліся ў ліпені з адкрытым лістом да намесніцы кіраўніка адміністрацыі Аляксандра Лукашэнкі Наталлі Пяткевіч з просьбай аб вяртанні ім Чырвонага касцёлу, які пачынае ўжо з сярэдзіны разбурацца. Людзі гатовыя самі сабраць грошы на рамонт святыні. Але Чырвоны касцёл дагэтуль пад замком. Нагадаем, што ў сакавіку 2022 года ў ім маліліся за мір ва Украіне, а ў верасні 2022 года там адбыўся пажар, пасля якога ўлады касцёл зачынілі.
У кастрычніку 2024 года завяршыўся збор подпісаў пад лістом міжнароднай панэлі парламетарыяў за свабоду рэлігіі і перакананняў, якая дзейнічае на базе Нарвежскага Хельсінкскага камітэту. Ліст мае быць накіраваны да Аляксандра Лукашэнкі. Падпісанты заклікаюць яго спыніць парушэнні ў сферы свабоды рэлігіі, якія звязаныя з прыняццем новай рэдакцыі закону «Аб унясенні зменаў у заканадаўства аб дзейнасці рэлігійных арганізацыяў».
Зміцер Міраш belsat.eu
