Следства ў справе супраць настаяцеля рыма-каталіцкай парафіі ў Валожыне, ксяндза Генрыха Акалатовіча завершанае. Суд прызначаць на канец верасня ці пачатак кастрычніка, паведамляе Katolik.life.
Працэс над святаром будзе закрыты.
Ксёндз Акалатовіч застаецца за кратамі ў СІЗА КДБ ў Менску з лістапада 2023 года. Пра ягоную справу афіцыйна нічога не паведамляюць. Вядома, што святара вінавацяць у здрадзе дзяржавы. 64-гадовы ксёндз не прызнае сябе вінаватым. У зняволенні ў яго моцна пагоршылася здароўе.
За кратамі ў Беларусі застаецца яшчэ адзін святар, Андрэй Юхневіч з Віцебску. Яго трымаюць у віцебскім СІЗА і не паведамляюць, у чым вінавацяць. Следства ў ягонай справе працягваецца.
Каля месяца таму апостальскі нунцый архіепіскап Антэ Ёзыч, які ўжо завяршыў сваю місію ў Беларусі, сустракаўся з Аляксандрам Лукашэнкам. Паводле афіцыйнай інфармацыі, падчас сустрэчы «былі закранутыя і пытанні, што хвалююць каталіцкую супольнасць у Беларусі, Лукашэнка паабяцаў іх разгледзець і паспрыяць хутчэйшаму развязанню».
Вернікі зазначаюць, што чакалі ад гэтай сустрэчы вызвалення святара Генрыха Акалатовіча.
«Пасля тых кампліментаў ад нунцыя падавалася, што ўжо на заўтра павінны бць вызваленыя святары і адчынены Чырвоны касцёл. Але… Мы не атрымалі ад нунцыя адказ, ці ён хадайнічаў пра гэта канкрэтна і якой была рэакцыя, аднак ён даў нам надзею», ‒ прыводзіць словы вернікаў каталіцкіх партал.
Каталікі Беларусі спадзяюцца, што валожынскі пробашч можа быць вызвалены пасля суда праз працэдуру памілавання.
Марыя Міхалевіч belsat.eu
