«На цокальным паверсе два разы быў прарыў водазабеспячэння, адтуль чуецца пах гнілі».
Касцельны камітэт і парафіяне Чырвонага касцёлу апублікавалі адкрыты ліст да нядаўна прызначанай намесніцы кіраўніка адміністрацыі Аляксандра Лукашэнкі Наталлі Пяткевіч. Вернікі парафіі Святога Сымона і Святой Алены ў сваім звароце нагадваюць, што іх каля 10 тысячаў і яны просяць вярнуць ім Чырвоны касцёл.
«Шэдэўр архітэктурнага дойлідства, візітная картка сталіцы Беларусі, прыходзіць у заняпад. Храм не праветрываецца, чуецца пах начыння і адзення, якія псуюцца, а на цокальным паверсе два разы быў прарыў водазабеспячэння і ацяплення, адтуль чуецца пах гнілі, абсыпалася тынкоўка на столях і сценах, гніюць шторы, дываны, абіўка на крэслах, псуецца мэбля, робяцца непрыдатнымі кнігі (каля 60 тысячаў) касцельнай бібліятэкі, абразы і карціны… На ўсіх паверхах выламаныя ўсе дзверы, раскіданыя на падлозе розныя рэчы. Пра дарагі арган і ў якім ён стане баімся нават узгадваць. Паважаная спадарыня Наталля, няўжо мы, вернікі Беларусі, заслужылі такое пакаранне?», – звяртаецца Касцельны камітэт і парафіяне да Наталлі Пяткевіч.
Просьбіты падкрэсліваюць, што гатовыя за свае сродкі і сваімі сіламі правесці рамонт у касцёле.
«Мы чулі, што пад заклад, пасля ўнесенай сумы, выпускаюцца з турмы зняволеныя алігархі і яны зноў працуюць. Нашу бяду ніхто не жадае ні падзяліць, ні заступіцца, ні левыя, ні правыя, таму што далёкія ад Бога, – гаворыцца ў звароце. – Мы прымем змучаны і прыніжаны храм як Журботная Маці Божая на Галгофе прыняла Цела Ісуса Хрыста, знятае з крыжа. Мы слязьмі і сваімі далонямі, сваімі сродкамі будзем чысціць і аднаўляць наш храм і вернем яму ўнутранае папярэдняе хараство і малітоўную цеплыню».
Чырвоны касцёл зачынены з верасня 2022 года. У 2020 годзе мітрапаліт Тадэвуш Кандрусевіч асудзіў сілавікоў, якія атачылі касцёл і заблакавалі ў храме каля 100 чалавек, якія ратаваліся там ад агрэсіі на пратэстах.
У сакавіку 2022 года ў Чырвоным касцёле маліліся за мір ва Украіне. А 26 верасня 2022 года там адбыўся пажар, пасля якога ўлады зачынілі касцёл ды так і не дазволілі вернікам трапіць туды.
Арсен Рудэнка belsat.eu
