Войскі на польска-беларускай мяжы ўжываюць зброю ў сярэднім некалькі разоў на дзень, аднак усе стрэлы папераджальныя, сцвярджае Міністэрства нацыянальнай абароны Польшчы.
Усяго з пачатку 2024 года польскія вайскоўцы на мяжы з Беларуссю зрабілі 1609 папераджальных стрэлаў. Пры гэтым аператыўная група «Бяспечнае Падляшша», што падтрымлівае Памежную ахову, сёлета не зафіксавала пацярпелых у выніку ўжывання зброі мігрантаў, піша «Rzeczpospolita».
Генерал Аркад'юш Шкутнік, камандзір «Бяспечнага Падляшша», прызнаў, што на мяжы ўжываецца гладкарульная зброя:
,,«Ужываем гумовыя кулі, якія не пранікаюць, і гэта крайняя мера – стрэл у кірунку чалавека. Але дзякуючы гэтаму пасля некалькіх разоў ужывання гладкарульнай зброі высветлілася, што самыя агрэсіўныя мігранты, калі бачаць, што салдаты ўзброеныя такой зброяй, не робяць спробаў агрэсіі, і гэта эфектыўны фактар стрымлівання», – адзначыў Шкутнік.
Сёлета 63 польскія жаўнеры атрымалі раненні падчас сутычак з мігрантамі. Вайсковец Матэўш Сітэк загінуў у выніку ранення нажом, яшчэ адзін атрымаў сур’ёзныя пашкоджанні твару. У большасці ж выпадкаў вайскоўцы атрымалі нязначныя пашкоджанні.
Таксама сёлета раненні атрымалі 10 памежнікаў, аднаго з іх шпіталізавалі. Паводле маёра Катажыны Здановіч з Падляскага аддзялення Памежнай аховы, у памежнікаў кідаюць камяні і шкляныя бутэлькі, страляюць з рагатак. Сёлета зафіксаваныя 12 выпадкаў, калі гэтыя прадметы траплялі ў памежнікаў. Матэрыялы пра факты нападу на памежнікаў перадаюцца ў пракуратуру, што распачынае папярэдняе расследаванне, аднак, паколькі нападнікі пераважна застаюцца на тэрыторыі Беларусі, высветліць іхныя асобы не ўдаецца, і расследаванне спыняецца.
Прэс-сакратар Акруговай пракуратуры ў Варшаве Пётр А. Скіба апавёў, што цяпер працягваюцца два расследаванні ў дачыненні польскіх вайскоўцаў. Першы датычыць інцыдэнту, што адбыўся ў лістападзе 2023 года, калі жаўнер выстраліў у сірыйскага мігранта, у выніку чаго апошні трапіў у шпіталь.
Таксама следчыя займаюцца выпадкам, калі два жаўнеры стралялі 25 сакавіка ў ваколіцах Дубічаў-Царкоўных падчас штурму мяжы некалькімі дзясяткамі замежнікаў. Паводле Нацыянальнай пракуратуры, вайскоўцы стралялі некалькі разоў, нягледзячы на тое, што сітуацыя не пагражала іхнаму жыццю.
Памежны камітэт Беларусі паведамляў, што 22 кастрычніка на мяжы з Польшчай, у Камянецкім раёне, знайшлі труп мігранта. Беларускі бок кажа, што памерлы мужчына быў выкінуты на тэрыторыю нашай краіны з Польшчы праз браму для жывёлінаў у агароджы на мяжы.
Паводле Памежнага камітэту, з пачатку 2024 года на мяжы загінулі шасцёра мігрантаў, з 2021 года – 27. Польскі бок сцвярджае, што на беларускай тэрыторыі загінулі як мінімум 45 мігрантаў, а агулам па абодва бакі мяжы Беларусі з Еўразвязам – не менш за 130 чалавек.
Міграцыйны крызіс на польска-беларускай мяжы распачаўся ў 2021 годзе. Польшча сцвярджае, што ён штучна створаны Аляксандрам Лукашэнкам і ёсць інструментам гібрыднай вайны.
15 кастрычніка 2024 года Польшча прыняла новую міграцыйную стратэгію, пакліканую ў тым ліку стрымаць міграцыйны крызіс. Адною з яе захадаў можа стаць часовае тэрытарыяльнае прыпыненне права на прытулак.
Марыя Міхалевіч belsat.eu
