«Белсат» аналізуе вынікі чарговага тыдня поўнамаштабнай вайны, распачатай Расеяй ва Украіне. Пра становішча на фронце станам на 9 верасня чытайце ў нашым матэрыяле.
Адносная стабілізацыя фронту пад Курскам
На паўночным фронце найбольш гарачым участкам па-ранейшаму застаецца тэрыторыя Коранеўскага і Суджанскага раёнаў Курскай вобласці РФ, дзе за апошні тыдзень, Збройныя сілы Украіны, валодаючы ініцыятывай, дасягнулі лакальных поспехаў. Разам з тым агулам сітуацыя на Куршчыне ўсё ж істотна не змянілася, што ў першую чаргу тлумачыцца падыходам дадатковых сілаў расейцаў, з дапамогай якіх удалося акапацца і сфармаваць больш-менш выразную лінію сутыкнення.
У гэты ж час перспектыўным для ЗСУ па-ранейшаму застаецца ўчастак Глушкоўскага раёну Курскай вобласці, які ляжыць з поўдня ад ракі Сейм: раней украінскія сілы знішчылі масты цераз раку, а цяпер працягваюць разбураць новыя пераправы праціўніка. Наступ украінцаў у гэтым кірунку выглядае лагічным, аднак пакуль не ажыццяўляецца.
Яшчэ адным актыўным участкам фронту на поўначы застаецца харкаўскі кірунак, дзе асноўныя баі лакалізуюцца ў ваколіцах населеных пунктаў Глыбокае і Ваўчанск у Харкаўскай вобласці. Тут большай ініцыятывай таксама валодаюць ЗСУ, аднак рэалізаваць яе ў канкрэтныя поспехі пакуль не ўдаецца.
Асобныя прарасейскія крыніцы пішуць, што таксама існуе верагоднасць наступу Збройных сілаў на іншых участках, у прыватнасці, гаворка вядзецца пра Бранскую і Белгародскую вобласці РФ.
Планы расейцаў на паўночным усходзе
На паўночным усходзе варта звярнуць увагу на паступовы рух войскаў РФ у бок ракі Аскіл: тут за апошні тыдзень фіксуюцца прасоўванні каля населеных пунктаў Пішчанае і Стэльмахаўка (памежжа Харкаўскай і Луганскай вобласцяў).
У перспектыве, калі расейцам удасца выйсці да самой ракі, у паўатачэнні можа апынуцца групоўка ЗСУ пад Купянскам на Харкаўшчыне, што з улікам ужо знішчаных мастоў цераз Аскіл можа вымусіць украінскае камандаванне адвесці свае сілы на захад.
Далей на поўдзень назіраецца пэўная актывізацыя расейцаў і ў ваколіцах гораду Часаў Яр: праўкраінскія крыніцы пацвярджаюць пераход праціўнікам каналу Сівэрскі Данец – Данбас на ўчастку каля сяла Калінаўка, у выніку чаго быў утвораны невялікі плацдарм на поўначы ад Часавага Яру.
Адначасова з гэтым назіраецца рух Узброеных сілаў РФ на паўднёвым усходзе ад гораду, дзе яны прасунуліся ў ваколіцах зруйнаванага сяла Клішчыеўка.
Выглядае на тое, што цяпер войскі РФ намагаюцца выпрастаць лінію сутыкнення ўздоўж каналу Сівэрскі Данец – Данбас, каб у далейшым паспрабаваць абысці горад Часаў Яр з флангаў.
Аднаўленне пазіцыяў ЗСУ пад Тарэцкам
Істотна змянілася сітуацыя цягам апошняга тыдня на тарэцкім кірунку, дзе баявыя дзеянні лакалізуюцца на тэрыторыі аднайменнай агламерацыі: Збройныя сілы Украіны, перакінуўшы дадатковыя рэзервы, аднавілі пазіцыі ў населеным пункце Нэліпаўка, а таксама адбілі значную частку суседняга Нью-Ёрку. Такім чынам ЗСУ ўдалося стабілізаваць паўднёвы фланг кірунку і пазбегнуць пагрозы атачэння Тарэцку з паўднёвага захаду.
Пры гэтым на ўсходзе агламерацыі захоўваецца ціск з боку УС РФ, аднак шчыльная гарадская забудова з’яўляецца не такой перспектыўнай у плане прасоўванняў.
Аўдзееўскі сцэнарый пад Невельскім
Удалося ЗСУ адносна стабілізаваць лінію сутыкнення і ў кірунку Пакроўку, у выніку чаго яна зафіксавалася па ўмоўнай лініі населеных пунктаў Гродаўка – Навагродаўка – Міхайлаўка.
Між тым далей на поўдзень па фронце сітуацыя становіцца крытычнай для ЗСУ: тут расейцы ціснуць на стыку пакроўскага і курахаўскага кірунку, імкнучыся злучыць свае групоўкі войскаў на ўсходзе ад гораду Курахава. Такім чынам ўкраінскія вайскоўцы, якія трымаюць абарону ў ваколіцах сяла Невельскае, рызыкуюць апынуцца ў атачэнні. Сам населены пункт ужо перайшоў пад кантроль войскаў РФ, якія цяпер атакуюць на захад ад Краснагораўкі і каля Гарняку.
На думку байцоў 46-й брыгады ЗСУ, у выніку захопу праціўнікам апошняга населенага пункту, істотна скароціцца акно магчымасцяў для выхаду байцоў з утворанага катла.
Тым часам у 47-й брыгадзе мяркуюць, што час для вываду войскаў без вялікіх стратаў прайшоў, і цяпер ЗСУ выпадае паўтарыць аўдзееўскі сцэнарый адыходу.
На самым поўдні Данецкай вобласці расейцы паступова прасоўваюцца ў ваколіцах гораду Вуглядар: на ўсходзе яны маюць поспехі каля сяла Вадзяное, у гэты ж час на паўднёвым захадзе яны занялі Прачыстаўку. Такім чынам УС РФ, зразумеўшы бессэнсоўнасць лабавых атак на горад, вырашылі абысці яго з флангаў. У далейшай перспектыве гэтая групоўка войскаў таксама мае выйсці да Курахава.
На іншых участках фронту адзначаюцца лакальныя пазіцыйныя баі, а таксама артылерыйскія абстрэлы ўздоўж лініі сутыкнення.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.
Наталля Кулыгіна belsat.eu
