Улады патрабуюць гэтага нават ад кіраўнікоў прыватных адукацыйных установаў.
У школы, дзіцячыя садкі, цэнтры дзіцячай творчасці ды іншыя адукацыйныя ўстановы паступіла ўказанне звольніць з працы ўсіх тых працаўнікоў, якія з 2020 года прыцягваліся да адміністратыўнай ці крымінальнай адказнасці з палітычных матываў.
Як паведамляюць крыніцы праваабаронцаў «Гомельскай Вясны», у Светлагорску мясцовыя чыноўнікі адукацыі патрабуюць выканання такога распараджэння нават ад кіраўнікоў прыватных установаў, якія выконваюць адукацыйныя ці выхаваўчыя паслугі. І тычыцца гэта не толькі педагагічных кадраў, але нават абслуговага персаналу.
Праваабаронцы «Гомельскай Вясны» праверылі такую інфармацыю ад некалькіх крыніцаў у Светлагорску. Яна пацвярджаецца. У той жа час у іншым раёне Гомельшчыны пра такое адкрытае ўказанне пакуль не чулі, хаця звальненні людзей, якіх улады рэпрэсавалі з палітычных матываў, таксама адбываюцца, але ціха.
Раней прадстаўнікі ўладаў, у тым ліку і сам Лукашэнка, казалі, што ў адукацыі могуць працаваць толькі «сапраўдныя патрыёты» – адданыя дзейнай уладзе людзі. Магчыма, кіраўніцтва Светлагорскага райаддзелу адукацыі пастанавіла прадэманстраваць асаблівы імпэт у выкананні гэтай завядзёнкі.
Нагадаем, пасля так званых выбараў 2020 года спецслужбы і сілавыя структуры Беларусі актыўна шукалі не толькі ўдзельнікаў масавых пратэстаў, але і тых, хто падпісваўся або галасаваў за альтэрнатыўных кандыдатаў. З 2020 да 2023 года «нелаяльных» грамадзянаў звальнялі з дзяржаўных установаў і сілавых ведамстваў, нярэдка асуджаючы на рэальныя тэрміны зняволення паводле сфабрыкаваных абвінавачанняў, незалежна ад іхнай дасведчанасці і прафесіяналізму.
Звальненні праводзіліся «спісамі» і расцягваліся ў часе, каб не парушаць Працоўнага працэсу і функцыянавання дзяржаўных органаў. Пад рэпрэсіі трапілі нават высокакваліфікаваныя спецыялісты, у тым ліку з галінаў аховы здароўя і навукі.
У распараджэнні «Кіберпартызанаў» апынуліся спісы спартоўцаў і былых працаўнікоў МУС, звольненых за нелаяльнасць да ўладаў. Побач з прозвішчамі ў спісах пазначаная не толькі прычына звальнення, але і інфармацыя пра тое, куды чалавек потым уладкаваўся ці ў якую краіну з’ехаў.
Але паводле «BYPOL», у сакавіку гэтага года ўлады Беларусі далі непублічны дазвол на тое, каб прымаць на працу людзей, якія ў 2020 годзе паставілі подпісы за альтэрнатыўных кандыдатаў. Там падкрэслілі, што іншых падрабязнасцяў, датычных гэтай інфармацыі, няма. Яны дапусцілі, што гэткая пастанова ўладаў звязаная з «катастрафічным кадравым голадам, які адчуваюць многія галіны пасля масавых звальненняў «нядобранадзейных спецыялістаў».
Тэса Анэйда belsat.eu
