Еўрапейскія дыпламаты 21 траўня запатрабавалі неадкладнага і безумоўнага вызвалення палітвязняў у Беларусі.
«ЕЗ патрабуе неадкладнага і безумоўнага вызвалення ўсіх палітычных зняволеных і іх поўнай рэабілітацыі. Вінаватыя павінны быць прыцягнутыя да адказнасці», – напісала Еўрапейская служба замежнапалітычнай дзейнасці ў сацсетцы X.
Дыпламаты выказалі салідарнасць з амаль 1200 беларусамі, якія застаюцца за кратамі за абарону ці рэалізацыю сваіх правоў чалавека. Яны ўтрымліваюцца ў бесчалавечных і прыніжальных умовах, шмат хто з іх у ізаляцыі.
«Сёння, у Дзень салідарнасці з палітычнымі зняволенымі Беларусі, стала вядома пра тое, што ў зняволенні памёр Валянцін Штэрмер. З 2020 года ў месцах пазбаўлення волі ў Беларусі памерлі не менш як 8 палітычных зняволеных. Мы памятаем пра іх і заклікаем неадкладна вызваліць усіх палітвязняў», – гаворыцца ў заяве ЕЗ.
Дыпламатычная місія нагадала Еўразвязу пра такі інструмент, як санкцыі супраць датычных да пераследу і судоў над палітвязнямі.
«Мы заклікаем Еўрапейскі Звяз і яго чальцоў увесці мэтавыя санкцыі ў дачыненні ўсіх тых, хто ўдзельнічаў у пераследзе, вынясенні прысудаў і жорсткім абыходжанні з палітычнымі зняволенымі, што прывяло ў тым ліку да смерці. Усе вінаватыя павінны быць прыцягнутыя да адказнасці», – заявілі дэпутаты Еўрапарламенту.
Згодна з інфармацыяй праваабарончага цэнтру «Вясна», на 21 траўня ў Беларусі было 1189 палітвязняў. Усяго за пяць гадоў такі статус атрымалі 3940 асуджаных.
Праваабаронцы абралі дату Дня салідарнасці з палітзняволенымі ў Беларусі невыпадкова: 21 траўня 2021 года ў папраўчай калоніі № 17 у Шклове памёр актывіст з Бярозаўкі Вітольд Ашурак. Ён быў асуджаны ў закрытым рэжыме на пяць гадоў зняволення.
Тэса Анэйда belsat.eu
