За мінулы год кошт арэнднага жылля ў Менску вырас на 10-15%, затое пасля прыходу да ўлады Доналда Трампа долар патаннеў – і зрабіў гэтую розніцу не заўважнай.
Кіраўніца аддзела арэнды агенцтва нерухомасці «Твая сталіца» Маргарыта Пачыцкая распавяла агенцтву «Спутник» пра тое, што адбываецца на рынку арэнднага жылля ў Менску.
За 200 долараў ужо не знайсці
Экспертка адзначае, што зараз на рынку назіраецца эфект плато. Кошты не растуць з канца мінулага года, а прытоку новых арандатараў няма.
«Ёсць меркаванне, што на рынку арэнды засталіся толькі дарагія варыянты. Але гэта не так. Так, ужо няма кватэр за 200 долараў у месяц, але тым не менш, бюджэтны клас усё яшчэ займае ільвіную долю прапаноў», – кажа яна.
Кошты за арэнду аднапакаёвай кватэры ў Менску зараз стартуюць ад 220 долараў. Як правіла, гаворка ідзе пра кватэры, якія даўно не бачылі рамонту і знаходзяцца ў аддаленых лакацыях. Аднушка з больш-менш акуратным рамонтам і не ў цэнтры гораду абыдзецца беларусам у 250-270 долараў. Кватэра ў новабудоўлі з рамонтам без вынаходстваў і мэбляй будзе каштаваць ад 320 долараў і вышэй.
Сярэдні кошт арэнды двухпакаёвых кватэр складае 300–350 долараў. З добрым рамонтам і побач з метро – 400 долараў.
Кошты на бюджэтныя «траячкі» складаюць 320-370 долараў, на «траячкі» камфорт-класу – ад 370 да 500 долараў.
Працоўныя мігранты замест айцішнікаў
На рынку становіцца ўсё больш учорашніх новабудоўляў, але большасць людзей іх пацягнуць не можа і глядзіць у бок сярэдніх коштаў. Эксперт канстатуе, што айцішнікаў, якія раней масава здымалі жыллё ў арэнду, у краіне фактычна не засталося. А тыя, што засталіся, бяруць адразу крэдыт.
«Раней сярод айцішнікаў быў выразна бачны трэнд еўрапейскага характару: маўляў, зараз я пажыву ў арэнднай кватэры, таму што даходы і магчымасці дазваляюць. Але потым, калі даходы ў IT-сферы знізіліся, многія з іх прыйшлі да высновы: навошта аддаваць вялікія грошы за чужую кватэру, калі іх можна пусціць у пакупку сваёй?» – кажа эксперт па нерухомасці.
Замест айцішнікаў прыехалі працоўныя мігранты, якія арандуюць танныя кватэры. Але іх не настолькі шмат, каб неяк паўплываць на попыт і расстаноўку сіл у сферы жылой арэнды, кажа экспертка.
«Яны часта выбіраюць найбольш бюджэтныя варыянты кватэр, якія называюць »бабулятнікамі«. Нярэдка арандуюць іх калектыўна. Ніякага нашэсця расейцаў, як часта пытаюцца, няма. Арандатары-замежнікі былі заўсёды, але гэта літаральна адзінкавыя працэнты, нават не дзясяткі», – падкрэслівае суразмоўніца.
Спрадвеку большасць уласнікаў мараць бачыць сярод сваіх арандатараў сям'ю з двух чалавек ва ўзросце каля 30 гадоў – з добрым дастаткам, без дзяцей і жывёл, а таксама без шкодных звычак.
Двухпакаёўка была 1600 рублёў, а стала 1350-1400 рублёў
З пачатку года долар патаннеў на 13 %. Але кошты не выраслі прапарцыйна прасадцы валюты: умоўная «двушка» каштуе ўжо не 1600 рублёў, а 1350-1400. Для тых, хто здымае жыллё з прывязкай да долара, гэта плюс.
Прыкладна 50% арандатараў заключаюць дамовы арэнды ў беларускіх рублях, другая палова – у доларах (пры гэтым плацеж усё роўна будзе ў нацвалюце).
«Нягледзячы на тое, што кошт арэнды вылічаецца ў беларускіх рублях, уласнік і арандатар усё роўна арыентуюцца на нейкую адзнаку ў доларах. Таму тыя арандатары, якія заключылі дагаворы ў беларускіх рублях у момант, калі долар быў 3,4-3,5, зараз вымушаны плаціць больш за тых, хто заключыў дагаворы першапачаткова з прывязкай да долара», – пракаментавала Маргарыта Пачыцкая.
Тэса Анэйда belsat.eu
