11-гадовую дзяўчынку з Ліды, якая 12 траўня выпала з атракцыёну «Хамер» і атрымала цяжкія траўмы, выпісалі з лякарні, паведамляе «Лида ТВ».
Пацярпелая дзяўчынка цяпер знаходзіцца ўдома, у Лідзе, ейны стан стабільны.
Здарэнне адбылося больш за месяц таму. 11-гадовая дзяўчынка разам з мамай праводзілі час у перасоўным луна-парку, які на працягу некаторага часу працаваў у горадзе, і вырашылі пакатацца на атракцыёне «Хамер». Ужо праз некалькі секунд пасля яго запуску дзяўчынка ўпала з вышыні.
Са шматлікімі траўмамі маленькую лідчанку даставілі ў рэанімацыю Лідскай цэнтральнай раённай лякарні. Там пацыентцы былі выкананыя ўсе неабходныя абследаванні: кампутарная тамаграфія галавы, органаў грудной клеткі, брушной поласці і тазу, лабараторныя абследаванні. Праведзеныя кансультацыі вузкімі спецыялістамі.
Для дадатковай дапамогі дзяўчынцы з Горадні былі выкліканыя з дапамогай санітарнай авіяцыі анестэзіёлаг-рэаніматолаг, траўматолаг і афтальмолаг. З Менску таксама па санавіяцыі быў выкліканы для правядзення кансультацыяў сківічна-тварны хірург рэспубліканскага ўзроўню.
Як толькі стан дзяўчынкі стабілізаваўся, цягам содняў у Ліду быў адпраўлены рэанімабіль з Горадні, на якім пацярпелую перавезлі ў Гарадзенскую абласную дзіцячую лякарню.
У Гарадзенскай лякарні дзяўчынка правяла больш за месяц, ёй зрабілі некалькі аперацыяў.
Маці дзяўчынкі ўдзячная лекарам лідскай і гарадзенскай лякарняў за тое, што ўратавалі ейнай дачцэ жыццё і здароўе.
«На дадзены момант маё дзіця, дзякуй Богу, жывое, амаль здаровае. Яна, праўда, яшчэ не ходзіць, але неўзабаве будзе пачынаць вучыцца хадзіць», – распавяла Анастасія Шандроха, маці дзяўчынкі, і заклікала ўсіх бацькоў быць уважлівымі.
Пасля здарэння Следчы камітэт ініцыяваў праверку.
«Асаблівая ўвага будзе нададзеная пытанням гарантавання тэхнікі бяспекі, а таксама прычынам і ўмовам, якія спрыялі траўмаванню дзіцяці», – зазначала прэс-служба СК.
Марыя Міхалевіч belsat.eu
