«Гэта ваенныя злачынствы». У ЕЗ паабяцалі пакараць датычных да бамбавання цывільных аб’ектаў ва Украіне
Афіцыйны прадстаўнік замежнапалітычнай службы Еўразвязу Пэтэр Стана пракаментаваў «Белсату» абстрэлы Украіны мінулай ноччу і заклікі Кіева да партнёраў перадаць знішчальнікі F-16. Ён сказаў, што кожная дзяржава асобна разгледзіць магчымасць перадачы самалётаў, а бамбаванне цывільных аб’ектаў назваў ваеннымі злачынствамі.
«Гэтыя бамбаванні цывільных аб’ектаў ёсць ваеннымі злачынствамі – і без пакарання яны не застануцца», – заявіў «Белсату» спікер замежнапалітычнай службы Еўразвязу Пэтэр Стана. Ён паабяцаў, што «усе датычныя: і камандзіры, і выканаўцы, і іхныя хаўруснікі – паўстануць урэшце перад судом».
Так Стана пракаментаваў абстрэлы, што ў ноч на пятніцу ўчыніла расейская армія.
У горадзе Умані Чаркаскай вобласці ракета трапіла ў жылы 9-павярховы дом. Паводле апошніх звестак паліцыі, лік ахвяраў дасягнуў 23, сярод іх – чацвёра дзяцей.
У Дняпры праз абстрэл быў зруйнаваны прыватны дом, дзе загінула 31-гадовая жанчына ды двухгадовае дзіця. Яшчэ 3 асобы пацярпелі.
У горадзе Украінка Кіеўскай вобласці абломкі расейскай ракеты пашкодзілі шматпавярховік, у выніку раненні атрымала 13-гадовая дзяўчынка.
Кіраўнік украінскага МЗС Дмытро Кулэба, каментуючы ў сваім Twitter гэтыя бамбаванні, напісаў, што «шлях да міру – узбраенне Украіны знішчальнікамі F-16». Пазней на прэс-канферэнцыі ў Адэсе міністр заявіў, што краінам-партнёрам неабходна як мага хутчэй ухваліць навучанне ўкраінскіх пілотаў на заходніх баявых самалётах. Гэта, на меркаванне Кулэбы, прывядзе да рашэння аб перадачы такіх самалётаў Украіне.
«Мы мусім скінуць Расею з неба», – сказаў міністр. Ён патлумачыў, што знішчальнікі неабходныя для прыкрыцця ўкраінскіх войскаў падчас контрнаступу, для абароны Чорнага мора і прыбярэжных тэрыторыяў.
Пэтэр Стана, каментуючы «Белсату» заклік кіраўніка МЗС, адзначыў, што гэтую праблему чальцы Еўразвязу мусяць развязаць самастойна:
«Калі ёсць запыт на F-16, то гэта справа дзяржаваў – чальцоў Еўразвязу, якім належаць гэтыя знішчальнікі, разгледзець, гатовыя яны перадаць іх Украіне або не. Але агулам Еўразвяз гатовы і далей падтрымліваць Украіну ды даваць ёй усё, што неабходна для абароны ад незаконнае агрэсіі».
Сяргей Крот belsat.eu
