Вярхоўны суд разгледзіць заяву пра змену прысуду асуджанаму за «здраду дзяржаве» былога капітана Генеральнага штабу Дзяніса Урада. Звесткі пра гэта з’явіліся ў спісе судовых пасяджэнняў на сайце Вярхоўнага суда.
Справу будуць разглядаць 18 жніўня «ў сувязі са змяненнем заканадаўства».
Справу №1У212 у закрытым рэжыме разгледзіць суддзя Аляксандр Лупіновіч. Пачатак а 10:00.
Магчыма, суд зменіць тэрмін пакарання з улікам новых нормаў заканадаўства, паводле якіх, адзін дзень у СІЗА залічваецца як паўтара дня ў калоніі.
У размове з карэспандэнтам «Белсату» сваякі Дзяніса Урада паведамілі, што нічога не ведаюць пра новы працэс і даведаліся пра гэта з медыяў. Сам афіцэр у лістах пра гэта мне нічога не пісаў.
Ён таксама паведамляў, што з ім «усё нармальна, працуе, займаецца спортам і чытае кнігі».
29-гадовага спецсувязіста Генштабу абвінавацілі паводле ч. 2 арт. 356 КК («Здрада дзяржаве, учыненая асобай, на якую распаўсюджваецца статус вайскоўца»). Падставу для такога абвінавачання ўлады ўбачылі ў тым, што ён 14 сакавіка сфатаграфаваў сакрэтны ліст ад міністра ўнутраных справаў Івана Кубракова міністру абароны Віктару Хрэніну і «даслаў польскаму тэлеграм-каналу». У лісце кіраўнік МУС, насуперак Канстытуцыі, прасіў напярэдадні Дня Волі прыцягнуць 3725 вайскоўцаў для аховы аб’ектаў.
Дзяніса Урада затрымалі 16 сакавіка, а ўжо 14 траўня – менш як праз два месяцы – суд вынес свой вердыкт. Разгляд справы праходзіў у закрытым рэжыме. Усё той жа Аляксандр Лупіновіч прысудзіў афіцэру 18 гадоў зняволення. Рашэнне суда набыло моц з моманту абвяшчэння і абскарджанню, апратэставанню ў апеляцыйным парадку не падлягала.
МГ belsat.eu