Злучаныя Штаты Амерыкі і Паўночнаатлантычны альянс сур’ёзна ставяцца да ядравых пагрозаў з боку Расеі. Гэтак 14 чэрвеня на прэс-канферэнцыі сталая прадстаўніца ЗША пры NATO Джульен Сміт адказала на пытанне карэспандэнта «Белсату» наконт намераў размяшчэння расейскай ядравай зброі ў Беларусі і пагрозаў Аляксандра Лукашэнкі скарыстаць яе.
Амбасадарка адзначыла, што цягам усёй вайны Расеі ва Украіне ЗША «ставіліся да бразгання ядравай зброяй вельмі і вельмі сур’ёзна».
«Мы, Злучаныя Штаты, вельмі адкрыта папярэдзілі расейцаў пра рызыкі выкарыстання тактычнай ядравай зброі, любой ядравай зброі ў гэтай вайне. І мы папярэдзілі іх пра наступствы, сур’ёзныя наступствы, з якімі яны сутыкнуцца, калі захочуць гэта зрабіць», – сказала Джульен Сміт.
Паводле яе, ЗША вельмі пільна сочаць за дзеяннямі Расеі, датычнымі ядравай зброі:
«Мы не бачым ніякіх прыкметаў існавання непазбежнай рызыкі таго, што яны будуць спадзявацца на ядравую зброю, але, зноў жа, мы будзем вельмі ўважліва сачыць за гэтым, асабліва ў сувязі з любымі новымі падзеямі ў Беларусі».
Сміт адзначыла, што пакуль у ЗША не бачаць прычынаў для змены сваёй стратэгічнай пазіцыі, «але гэта жывая дыскусія і пытанне, да якога, ізноў жа, мы ставімся вельмі сур’ёзна і будзем працягваць вельмі ўважліва сачыць у рамках усяго Альянсу».
Ядравую зброю Уладзімір Пуцін і Аляксандр Лукашэнка плануюць размясціць у Беларусі 7–8 ліпеня – напярэдадні саміту NATO ў Вільні. Пры гэтым у ЗША пакуль «не бачылі ніякіх прыкметаў таго, што перамяшчэнне ядравай зброі неўзабаве пачнецца або ўжо адбываецца», – кажа каардынатар стратэгічных камунікацыяў у Радзе нацыянальнай бяспекі Джон Кербі.
У сваю чаргу камандуючы аб’яднанымі сіламі ЗСУ генерал-лейтэнант Сяргей Наеў заявіў, што Расея перакінула ў Беларусь пакуль толькі носьбіты ядравай зброі, самой ядравай зброі яшчэ няма і невядома, ці будзе яна ўвогуле перададзеная.
Калі ядравая зброя будзе пастаўленая ў Беларусь, прадстаўнікам мясцовага рэжыму яе давяраць не збіраюцца. Паводле дамовы, падпісанай міністрамі абароны Віктарам Хрэніным і Сяргеем Шайгу, Расея не мае намеру перадаваць кантроль над нестратэгічнай ядравай зброяй Беларусі. Ці выкарыстоўваць гэтую зброю, будзе вызначаць Масква.
Пры гэтым 13 чэрвеня Лукашэнка падкрэсліў, што гэта не Расея імкнецца размясціць ядравую зброю ў Беларусі, а ён сам настойліва патрабаваў гэтага, каб гарантаваць уласную бяспеку.
«Я думаю, наўрад ці камусьці захочацца ваяваць з краінай, што мае такую зброю. Гэта зброя стрымлівання», – сказаў ён.
Калі ж нікога стрымаць такім чынам не ўдасца, Лукашэнка паабяцаў «неадкладны» адказ.
Макар Мыш belsat.eu