Паводле папярэдняй інфармацыі, эксперты МАГАТЭ застануцца на атамнай электрастанцыі да 3 верасня, паведамляе «Энергаатам».
Генеральны дырэктар МАГАТЭ Рафаэль Гросі разам з большасцю чальцоў місіі з’ехалі а 18-й гадзіне паводле мясцовага часу. Перад ад’ездам Гросі заявіў, што за некалькі гадзінаў працы на ЗАЭС місіі ўдалося сабраць «шмат важнай інфармацыі», а ён сам «пабачыў галоўныя рэчы, якія хацеў пабачыць».
Пяцёра прадстаўнікоў місіі, якія засталіся, разгружаюць абсталяванне, якое прывезлі з сабой, і працягнуць працу на станцыі.
1 верасня маніторынгавая місія МАГАТЭ прыбыла на Запарожскую АЭС у акупаваным расейцамі ўкраінскім горадзе Энергадары.
МАГАТЭ сфармавала місію для візіту на акупаваную Запарожскую атамную электрастанцыю на запрашэнне ўраду Украіны. У склад місіі ўвайшлі 14 міжнародных экспертаў. Узначаліў групу генеральны дырэктар МАГАТЭ Рафаэль Гросі. Місія факусуецца на трох задачах: фізічная абарона, ядравая бяспека, гарантыі нераспаўсюджання ядравых матэрыялаў.
Кіраўнік Офісу прэзідэнта Украіны Андрэй Ярмак заяўляў, што Расея імкнецца сарваць візіт місіі МАГАТЭ, імітуючы баявыя дзеянні ў Энергадары і абстрэльваючы тэрыторыю каля АЭС. Напярэдадні візіту місіі стала вядома, што ў выніку абстрэлаў расейцамі пляцоўкі Запарожскай АЭС спрацавала аварыйная абарона і адключыўся пяты працоўны энергаблок.
Марыя Міхалевіч belsat.eu
