Маніторынгавая місія МАГАТЭ прыбыла на Запарожскую АЭС у акупаваным расейцамі ўкраінскім горадзе Энергадары. Пра гэта ў 14:26 па мясцовым часе паведаміла прэс-служба ўкраінскага «Энергаатаму».
Пра прыбыццё місіі МАГАТЭ на Запарожскую АЭС пішуць таксама расейскія СМІ. «Інтэрфакс» паведаміў, што ў 14:15 па мясцовым часе на тэрыторыю станцыі ўехаў картэж з дзевяці аўтамабіляў з экспертамі.
Reuters са спасылкай на ўкраінскую крыніцу піша, што працягласць знаходжання місіі на АЭС можа быць больш кароткай, чым планавалася.
Па запрашэнні ўраду Украіны МАГАТЭ сфармавала місію для візіту на акупаваную Запарожскую атамную электрастанцыю. У склад місіі ўвайшлі 14 міжнародных экспертаў. Узначаліў групу генеральны дырэктар МАГАТЭ Рафаэль Гросі. Місія факусуецца на трох задачах: фізічная абарона, ядравая бяспека, гарантыі нераспаўсюджання ядравых матэрыялаў.
Кіраўнік Офісу прэзідэнта Украіны Андрэй Ярмак заяўляў, што Расея імкнецца сарваць візіт місіі МАГАТЭ, імітуючы баявыя дзеянні ў Энергадары і абстрэльваючы тэрыторыю каля АЭС. Напярэдадні візіту місіі стала вядома, што ў выніку абстрэлаў расейцамі пляцоўкі Запарожскай АЭС спрацавала аварыйная абарона і адключыўся пяты працоўны энергаблок.
Пра тое, што расейскія войскі абстрэльваюць узгоднены маршрут, па якім місія МАгАтЭ павінна трапіць на Запарожскую АЭС, паведамляў таксама кіраўнік Запарожскай абласной ваеннай адміністрацыі Аляксандр Старух.
Марыя Міхалевіч belsat.eu
