Кааліцыя беларускіх НДА накіравала ў ААН даклад пра сітуацыю ў беларускай медыцыне. У справаздачы гаворыцца пра недахоп лекаў, цяжкасці з доступам да жыццёва неабходных прэпаратаў, ад’езд з краіны лекараў, жудасны стан медычнай этыкі і правоў пацыента і чалавека падчас псіхіятрычнага лячэння ды іншыя парушэнні, піша тэлеграм-канал «Белые Халаты».
Раз на 4,5 года кожная краіна – сябар ААН праходзіць своеасаблівы «экзамен» у правах чалавека: расказвае пра свае справы, а іншыя краіны даюць рэкамендацыі, што трэба палепшыць, – адбываецца так званы Універсальны перыядычны агляд (УПА).
Беларускія праваабаронцы прааналізавалі, як Беларусь выканала рэкамендацыі папярэдняга УПА 2020 года і зрабілі выснову: сітуацыя вельмі кепская. З 266 рэкамендацыяў беларуская дзяржава ў рознай ступені прыняла 155. Цалкам былі выкананыя дзве (1,3 %), часткова – 24 (15,5 %). 14 пунктаў не ўдалося ацаніць праз недахоп інфармацыі.
Беларускія НДА, сярод якіх у тым ліку Фонд медычнай салідарнасці «BYMEDSOL», адзначылі гэта ў сваёй справаздачы, а таксама апісалі сітуацыю з правамі чалавека ў краіне і прапанавалі ААН пытанні, якія варта задаць уладам Беларусі.
У дакладзе адзначаецца, што ў Беларусі ёсць праблемы з доступам да якасных лекаў і вакцынаў, які дзяржава мусіць забяспечыць у тым ліку праз закупкі з удзелам міжнародных арганізацыяў. НДА таксама звяртаюць увагу на тое, што ў нашай краіне не публікуецца ключавая статыстыка ў галіне аховы здароўя і дэмаграфіі, ды заклікаюць выправіць гэтую сітуацыю.
У дакуменце адзначаецца, што забеспячэнне медычнай дапамогі ў Беларусі дэманструе ўстойлівае пагаршэнне ў выніку рэпрэсіўных дзеянняў ураду.
,,«Было зафіксавана мноства выпадкаў прыпынення дзейнасці прыватных медычных цэнтраў. Падтрыманне ўрадам ваеннай агрэсіі Расеі супраць Украіны яшчэ больш паглыбіла недахоп жыццёва неабходных медыкаментаў і медычнага абсталявання, нягледзячы на рост патрэбы ў іх», – сцвярджаюць аўтары дакладу.
Асобна ідзе гаворка пра беларускую вакцыну «Белковідвак», стварэнне якой, згодна са справаздачай, суправаджалася сакрэтнасцю, парушэннямі нарматыўных патрабаванняў і сумневамі ў яе эфектыўнасці.
«Адмова ад закупкі правераных вакцынаў і паведамленні аб несанкцыянаванай утылізацыі прэпаратаў яшчэ больш падарвалі давер грамадства і паслабілі эфектыўнасць барацьбы з COVID-19 у краіне», – сцвярджаецца ў дакладзе.
Кажуць беларускія НДА і пра недахоп медычнага персаналу, які становіцца ўсё больш сур’ёзным у звязку з масавым ад’ездам з краіны лекараў, незадаволеных умовамі працы, аплатай працы і запужаных палітычнымі рэпрэсіямі.
Згадваецца ў справаздачы і стан медычнай этыкі ў Беларусі ды псіхіятрычнага лячэння.
«Псіхіятрычныя ўстановы сістэматычна парушаюць правы пацыентаў: гаворка ідзе пра незаконнае ўтрыманне, прымусовае лячэнне і злоўжыванні. Пацыентаў часта прымушаюць падпісваць формы згоды, абмяжоўваюць іх свабоду перасоўвання, забіраюць асабістыя рэчы, абмяжоўваюць кантакт са сваякамі і не забяспечваюць юрыдычнай абароны. Спробы дамагчыся выпіскі могуць прывесці да ўжывання абмежавальных захадаў, узмацнення медыкаментознага ўздзеяння ці пераводу ў іншую ўстанову», – пішуць аўтары дакументу.
Марыя Міхалевіч belsat.eu
