На Нацыянальным прававым інтэрнэт-партале 31 траўня апублікавалі пастанову Міністэрства адукацыі Беларусі № 72 за 15 красавіка 2025 года, якая ўносіць змяненні ў пастанову № 322 за 19 верасня 2022 года «Аб установе агульнай сярэдняй адукацыі». У раздзеле 3 новай пастановы прапісваюцца патрабаванні да выгляду навучэнцаў школаў, што ўступаюць у моц 1 верасня бягучага года.
Правы вучняў замяніліся на патрабаванні да адзення
Патрабаванні да школьнага адзення прапісаныя ў раздзеле 3 пастановы, якая называецца «Навучэнцы ва ўстанове агульнай сярэдняй адукацыі. Патрабаванні да дзелавога стылю адзення». У ранейшай версіі дакументу назва гучала «Навучэнцы ва ўстанове агульнай сярэдняй адукацыі. Іхныя правы і абавязкі».
Згодна з абноўленаю пастановаю, навучэнцы ўстановаў агульнай сярэдняй адукацыі мусяць прытрымлівацца дзелавога стылю адзення.
Дзелавы стыль адзення, паводле аўтараў дакументу, – гэта строгі вытрыманы стыль, які можа залучаць агульныя (аднолькавыя) элементы школьнага адзення з размяшчэннем на адным з элементаў эмблемы ўстановы агульнай сярэдняй адукацыі (пінжаку, камізэльцы, сарафане, сукенцы).
Для хлопчыкаў (хлопцаў) у камплект дзелавога стылю адзення можа ўваходзіць пінжак, камізэлька, штаны, кашуля з кароткімі і доўгімі рукавамі, гольф, гальштук. Для дзяўчатак (дзяўчат) – пінжак, камізэлька, спадніца, штаны, блузка з кароткімі і доўгімі рукавамі, гольф, сарафан, сукенка.
Узімку ў камплект дзелавога стылю адзення можа ўваходзіць трыкатажны світар.
Навучальна-палявыя зборы і грамадска-карысная праца
Акрамя адзення, пастанова закранае і іншыя пытанні. Гэтак, цяпер клас можна будзе дзяліць на дзве групы для заняткаў па замежных мовах пры напаўняльнасці класу не менш за 20 навучэнцаў (раней было патрабаванне не менш за 9 дзяцей).
Па запытах законных прадстаўнікоў навучэнцаў школы змогуць праводзіць стымулявальныя і падтрымлівальныя заняткі на платнай аснове на падставе дамовы аб платным наданні паслуг.
Працягласць навучальна-палявых збораў і практычных заняткаў медычнай падрыхтоўкі і колькасць вучэбных гадзінаў на іх будуць вызначацца ў адпаведнасці з тыпавым навучальным планам установы агульнай сярэдняй адукацыі адпаведнага віду.
З вучнямі 5–8 класаў школаў, якія маюць навучальна-доследныя гаспадаркі, пасля завяршэння навучальных заняткаў на працягу 5 дзён па 3 вучэбныя гадзіны на дзень будуць праводзіцца практычныя заняткі. З вучнямі 5–8 класаў школаў, якія не маюць гаспадарак (за выключэннем вучняў 5–8 класаў санаторных школаў-інтэрнатаў, гімназіяў – каледжаў мастацтваў, вучэльняў алімпійскага рэзерву, 8 класу кадэцкіх вучэльняў, спецыялізаваных ліцэяў) на працягу 5 дзён па 3 вучэбныя гадзіны на дзень праводзяцца грамадска карысная праца (усяго 15 навучальных гадзінаў на клас).
Тэрміны, парадак арганізацыі практычных заняткаў, грамадска карыснай працы вызначае кіраўнік установы агульнай сярэдняй адукацыі ці ўпаўнаважаная ім асоба.
У навучальны перыяд, з 1 верасня да 31 траўня, прадугледжаная грамадска-карысная праца з разліку 1 навучальная гадзіна на тыдзень у 3–8 класах і 2 навучальныя гадзіны на тыдзень у 9–11 класах.
Унесеныя змяненні ў пункт, датычны вылучэння навучальных гадзінаў на правядзенне з вучнямі 10–11 класаў практычных заняткаў кіравання транспартавымі сродкамі катэгорыяў B, В і C – прыбралі пазнаку, што навучанне будзе праводзіцца пры наяўнасці неабходнай матэрыяльна-тэхнічнай базы.
Марыя Міхалевіч belsat.eu
